ایک نئے دور میں تعلیمی نظام اور اُستاد کے کردار کو تیزی سے بدلتی ہوئی دُنیا کے مطابق ڈھالنے کی ضرورت ہے ۔اُستاد صرف علم پھیلانے والا نہیں ہوتا ۔ ایک اُستاد وہ ہوتا ہے جو مختلف ہنر سکھاتا ہے ، تخلیقی صلاحیتوں کو روشن کرتا ہے ، بہتر زندگی گزارنے کے لئے نوجوان پود میں جدت پیدا کرتا ہے ۔لیفٹیننٹ گورنر منو ج سِنہا
کشمیر انفو//
جموں/یکم؍مارچ//لیفٹیننٹ گورنر منوج سِنہا نے کلسٹر یونیورسٹی جموں کے یوم تاسیس کی تقریب سے پدم شری پدما سچدیو گورنمنٹ پی جی کالج فار وومن گاندھی نگر میں خطاب کیا۔لیفٹیننٹ گورنر نے کلسٹر یونیورسٹی کو معیاری تعلیم میں بہترین کارکردگی کا مظاہرہ کرنے پر مبارک بادد یتے ہوئے کہا کہ یکم مارچ 2017ء کو پانچ کانسٹی ٹیوئنٹ کالجوں کے ساتھ قائم ہونے والی یونیورسٹی ، سکل ڈیولپمنٹ پر توجہ دینے او رمتحرک اِداروں کو نئے خیالات اور دریافتوں کے مراکز میں تبدیل کرنے سے ایک چینج ایجنٹ کا کردار ادا کر رہی ہے ۔اُنہوں نے معاشرے کی افزودگی، بہترین صلاحیتوں کی تخلیق اور تربیت میں کالج کیمپس اور کلاس روموں کے اہم کردار پرروشنی ڈالی اور قومی تعلیمی پالیسی سے ہم آہنگی میں ضروری تبدیلیوں پر زور دیا۔لیفٹیننٹ گورنر نے کہا،’’ ایک نئے دور میں تعلیمی نظام اور اُستاد کے کردار کو تیزی سے بدلتی ہوئی دُنیا کے مطابق ڈھالنے کی ضرورت ہے ۔
اُستاد صرف علم پھیلانے والا نہیں ہوتا ۔ ایک اُستاد وہ ہوتا ہے جو مختلف ہنر سکھاتا ہے ، تخلیقی صلاحیتوں کو روشن کرتا ہے ، بہتر زندگی گزارنے کے لئے نوجواد پود میں جدت پیدا کرتا ہے ۔‘‘اُنہوں نے کہا کہ نئی ایجاد ماضی کی یادوں یا کتابوں سے نہیں بلکہ آزاد ذہن اور تجسس سے بھرے نوجوان ذہن سے پیدا ہوگی ۔اُنہوں نے مزید کہا کہ تعلیمی اِداروں کے تجسس، اختراع ، ایجاد کرنے کے لئے ہمیں قومی تعلیمی پالیسی کی سفارشات پر عمل درآمد کرنا چاہیے۔اُنہوں نے کہا کہ ہندوستان کی 5ٹریلین معیشت میں اِختراع کا ایک بڑ ا حصہ ہوگا ۔ اُنہوں نے تعلیمی اِداروں سے کہا کہ وہ ڈیجیٹلائزیشن او رمستقبل کی ٹیکنالوجی کی رفتار کو برقرار رکھیں۔لیفٹیننٹ گورنر نے کہا،’’ ہمیں نصابی کتب کا بوجھ ہٹانا چاہیے اور نوجوان طلباء میں نئی دریافتوں کی خواہش پیدا کرنی چاہیے ۔ ہمیں ان کو نامعلوم کی تلاش کرنے کی ہمت اور طاقت دینی چاہیے نہ کہ صرف نصاب ۔ ہمیں انہیں تعلیمی آزادی فراہم کرنی چاہئے تاکہ وہ خود کو جان سکیں اور اَپنی اِنفرادیت کا احترام کریں۔‘‘اُنہوں نے مزید کہا کہ تمام تعلیمی اِداروں کو اُبھرتی ہوئی دُنیا کے ساتھ چلنا ہوگا۔لیفٹیننٹ گورنر نے مختلف شعبوں بشمول سیاحت ، صنعتوں ، روزی روٹی پیدا کرنے ، کھیلوں اور لوگوں کے لئے خدمات کو بہتر بنانے کی خاطر کئے گئے اقدامات پر بھی بات کی۔لیفٹیننٹ گورنر نے جموںوکشمیر کی پوری اِنتظامیہ عام آدمی کی فلاح و بہبود کے لئے کام کررہی ہے ۔ اُنہوں نے کہا کہ وہ وقت گزر گیا جب جموںوکشمیر کی اِنتظامیہ چند مٹھی بھر لوگوں کی خواہشات پر چل رہی تھی۔اُنہوں نے کہا کہ اِنتظامیہ میں 20,000 خالی اَسامیوں کو جلد پُر کیا جائے گا۔اُنہوں نے بھرتی اِمتحان میں دھاندلی کے ذمہ داروں کو سخت سزا دینے کی یقین دہانی بھی کی ۔
لیفٹیننٹ گورنر نے اِنسداد تجاوزات مہم کے بارے میں بات کرتے ہوئے کہا کہ اِنسداد تجاوزات مہم نے صرف بڑے اور بااثر لینڈ گرابزرسے زمینیں واگزار کی ہیں جنہوں نے سرکاری اَراضی کے بڑے ٹکڑوں پر ناجائز قبضہ کر رکھا ہے اور اگر کوئی غریب شخص اِنسداد تجاوزات مہم سے متاثر ہوا ہے تو متعلقہ اَفسران کے خلاف سخت کارروائی کی جائے گی۔لیفٹیننٹ گورنر نے تعلیمی اِداروں اور طلباء سے کہا کہ وہ جموںوکشمیر میں جی20 سمٹ کے اِنعقاد میں اِجتماعی طور پر شرکت کریں ۔اُنہوں نے مزید کہا کہ جموںوکشمیر کے سماجی و ثقافتی سفیر بنیں اور دُنیا کو جموںوکشمیر کے تنوع سے آگاہ کریں۔اُنہوں نے کہا کہ تعلیمی اِداروں کو بھی مقامی مسائل کے حل کے لئے فعال طور پر خود کو وقف کرنا چاہیے۔اِس موقعہ پر لیفٹیننٹ گورنر نے جموں کی کلسٹر یونیورسٹی کے سکول آف سائنسز کے لیبارٹری بلاک کا اِفتتاح کیا اور 39.35 کروڑ روپے کی لاگت سے بننے والے ایگزام نیشن بلاک کا سنگ بنیاد رکھا۔لیفٹیننٹ گورنر نے یووا ترنگ۔ 2023 میں بہترین کارکردگی کا مظاہرہ کرنے والے طلباء کو بھی مبارک باد دی۔لیفٹیننٹ گورنر کے مشیر راجیو رائے بھٹناگر ، چیف سیکرٹری ڈاکٹر ارون کمار مہتا اور کلسٹر یونیورسٹی جموں کے وِی سی بیچن لال نے کلسٹریونیورسٹی جموں کے بنانے کے سفر کو شیئر کرتے ہوئے یونیورسٹی کی کامیابیوں اور تعلیمی شعبے میں متعارف کی گئی اِصلاحات کو اُجاگر کیا۔
