کشمیر انفو//
شوپیان/15؍مارچ:ضلع ترقیاتی کمشنر شوپیان سچن کمار واشیا نے آج کیلر شوپیاں میں ہفتہ وار بلاک دیوس کی صدارت کی۔تحصیل کے مختلف علاقوں سے تعلق رکھنے والے لوگوں نے ضلع ترقیاتی کمشنر کے سامنے ترقیاتی مسائل ، پینے کے پانی کی مناسب دستیابی ، بلا تعطل بجلی کی فراہمی ، سڑک رابطے اور دیگر ترقیاتی کاموں اور عوامی فلاح و بہبود کے اقدامات سے متعلق شکایات کو جھنڈی دِکھا کر پیش کیا۔ضلع ترقیاتی کمشنر نے تمام عوامی مسائل اور مطالبات کو بغو ر سنا اور متعلقہ اَفسران سے مطالبات کو ترجیحی بنیادوں پر حل کرنے کی ہدایات جاری کیں۔ ہنگامی نوعیت کے بعض مسائل کا موقعہ پرہی اَزالہ کیا گیا۔اُنہوں نے اِس موقعہ پر خطاب کرتے ہوئے ہفتہ وار عوامی رسائی پروگرام کی اہمیت پر روشنی ڈالی اور کہا کہ بلاک دیوس کے اِنعقاد کا مقصد لوگوں تک ان کی دہلیز پر پہنچنا ، ان کی شکایات سننا اور کم سے کم وقت میں ان کا اَزالہ کرناہے۔ضلع ترقیاتی کمشنر نے مزید کہا کہ یہ اِنتظامیہ اور لوگوں کے درمیان بہتر روابط کا باعث بنتا ہے اور شراکت داروں کی متحرک شرکت سے مؤثر منصوبہ بندی اور ترقیاتی اہداف کی عمل آوری کو یقینی بناتا ہے۔اُنہوں نے اَفسران پر زور دیا کہ کہ وہ مطالبات کو ترجیح دیں اور مقررہ مدت میں ان کا اَزالہ کریں۔اُنہوں نے محکموں اور پی آر آئیز پر زور دیا کہ وہ علاقے کے عام لوگوں کو فائدہ پہنچانے کے لئے مل کر کام کریں ۔اِس موقعہ پر جوائنٹ ڈائریکٹر پلاننگ خورشید احمد کھٹانہ ، تحصیل دار کیلر ، بی ڈی او ، اَفسران و ملازمین موجود تھے۔
