کشمیر میں بارشوں کا سلسلہ جاری، باغ مالکان سے بادو پاشی نہ کرنے کی تاکید

مانیٹرنگ//
سری نگر، یکم اپریل : وادی کشمیر میں محکمہ موسمیات کی پیش گوئی کے عین مطابق رک رک کر بارشوں کا سلسلہ جاری ہے۔
متعلقہ محکمے کے ایک ترجمان کے مطابق وادی میں اگلے چوبیس گھنٹوں کے دوران میدانی علاقوں میں رک رک کر بارشیں جبکہ بالائی علاقوں میں برف باری کا امکان ہے۔
انہوں نے کہا کہ بعد ازاں وادی میں 3 اپریل سے 6 اپریل تک موسم ابر آلود رہنے کا امکان ہے اور اس دوران گرج و چمک کے ساتھ رک رک کر بارشیں بھی ہوسکتی ہیں۔
ان کا کہنا تھا کہ وادی میں اس دوران تیز ہوائیں بھی چل سکتی ہیں۔
محکمے نے باغ مالکان سے 6 اپریل تک باغوں کی دوا پاشی کرنے سے اجتناب کرنے کی تاکید کی ہے۔
انہوں نے لوگوں سے کہا ہے کہ وہ قومی شاہراہ اور دیگر سڑکوں پر سفر اختیار کرنے سے قبل ٹریفک حکام سے رابطہ کریں۔
دریں اثنا سری نگر میں گذشتہ چوبیس گھنٹوں کے دوران 5.2 ملی میٹر بارش ریکارڈ ہوئی ہے جبکہ قاضی گنڈ میں 1.6 ملی میٹر، پہلگام میں3.3 ملی میٹر، گلمرگ میں3.4 ملی میٹر، کپوارہ میں5.3 ملی میٹر اور کوکر ناگ میں 9.0 ملی میٹر بارش ریکارڈ ہوئی ہے۔
بارشوں کے باوجود وادی کے بیشتر مقامات پر شبانہ درجہ حرارت میں بہتری درج ہوئی ہے۔
گرمائی دارلحکومت سری نگر میں کم سے کم درجہ حرارت 9.1 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت7.9 ڈگری سینٹی گریڈ ریکارڈ ہوا تھا۔
وادی کے مشہور ترین سیاحتی مقام گلمرگ میں کم سے کم درجہ حرارت0.8 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت 0.4 ڈگری سینٹی گریڈ ریکارڈ ہوا تھا۔
وادی کے دوسرے مشہور سیاحتی پہلگام میں کم سے کم درجہ حرارت 4.6 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت3.2 ڈگری سینٹی گریڈ ریکارڈ ہوا تھا۔
سرحدی ضلع کپوارہ میں کم سے کم درجہ حرارت 6.8 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت5.7 ڈگری سینٹی گریڈ ریکارڈ ہوا تھا۔
گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت8.0 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت 6.8 ڈگری سینٹی گریڈ ریکارڈ ہوا تھا۔
لداخ یونین ٹریٹری کے ضلع لیہہ میں کم سے کم درجہ حرارت منفی1.2 ڈگری سینٹی گریڈ ریکارڈ کیا گیا جبکہ ضلع کرگل میں کم سے کم درجہ حرارت منفی2.1 ڈگری سینٹی گریڈ ریکارڈ ہوا ہے۔