کرگل ؍؍رنگ یل نیوزسروس؍؍ممبرپارلیمنٹ لداخ جمیانگ ژھیرینگ نمگیال یوٹی لداخ نے قومی راجدھانی نئی دہلی میں مرکزی وزیر داخلہ امیت شاہ سے ملاقات کرکے خطے کی تعمیروترقی اور دیگر مسائل کواجاگر کیا ہے ۔ذرائع کے مطابق ممبرپارلیمنٹ لداخ نے مرکزی وزیر داخلہ کو یوٹی لداخ کے مختلف عوامی مسائل اور مطالبات سے آگاہ کرتے ہوئے ضلع کرگل کے دوردرازعلاقہ زنسکاراور ضلع لہہ کے نوبراہ کو نئے انتظامی اضلاع تشکیل دینے سمیت لداخ کے بے روزگارنوجوانوں کو روزگارکے مواقع فراہم کرنے کیلئے حکومت کے گزیٹیڈپوسٹوں کے عہدوں کی تیزی سے بھرتی ،لداخ خودمختارپہاڑی ترقیاتی کونسل لہہ اور کرگل کوقانون سازیہ کے اختیارات دینے کے لئے ہل کونسل ایکٹ میں معقول ترمیم کرکے بااختیاربنانے ،بوٹی زبان کے دوسوچھیالیس اساتذہ کے خالی اسامیوں کو پُر کرنے اوربوٹی زبان کو آئین ہندکے آٹھویں شیڈول میں شامل کرنے کے علاوہ کئی مطالبات کئے ہیں ۔انھوں نے مرکزی وزیر سے یوٹی لداخ کے دونوں ہل کونسلوں کو بااختیاربناکر قانون سازیہ کے اختیارات فراہم کرنے کاپُرزورمطالبہ کیا ہے تاکہ دونوں ہل کونسلوں کو زمین وروزگار،ماحولیات ،ثقافت اور لسانیات کے تحفظ کے علاوہ دیگراہم شعبوں میںبا اختیاربنایاجاسکے ۔انہو ںنے وزیرا عظم نریندرمودی کی قیادت والی بھارتیہ جنتاپارٹی کی مرکزی حکومت کی جانب سے یوٹی لداخ کوضرورت کے مطابق تعاون فراہم کرنے پر شکریہ اداکیا۔واضح رہے اس سے قبل یوٹی لداخ کی بھارتیہ جنتاپارٹی کا ایک اعلیٰ سطحی وفد ممبرپارلیمنٹ لداخ جمیانگ ژھیرینگ نمگیال کی قیادت میں مرکزی امورداخلہ کے وزیر مملکت نتیانندرائے سے ملاجہاں انہو ںنے ضلع کرگل کے زنسکاراور ضلع لہہ کے نوبراہ کو انتظامی اضلاع تشکیل دینے کی پرزورالفاظ میں مطالبہ کیا۔وفد میں ممبرپارلیمنٹ لداخ کے علاوہ بی جے پی کے ریاستی نائب صدرلداخ پھونسوک وانگڈن شونو،صدربی جے پی زنسکارستزین لقپااورکونسلرنوبراہ ژھیرینگ سنڈوپ بھی شامل تھے ۔نیز وفد نے لداخ کے دورافتادہ علاقوں میں انتظامی امورکو موثر طریقے پر چلانے کے لئے نئے انتظامی اکائیوں کی تشکیل کی اہمیت پر زوردیا ۔تاکہ لداخ کی یکسان تعمیر وترقی کو یقینی بنایاجاسکے ۔
