سری نگر،28 جولائی:جموں و کشمیر پولیس نے جنوبی کشمیر کے کھریو اونتی پورہ علاقے میں حزب المجاہدین نامی جنگجو تنظیم سے وابستہ ایک سرگرم جنگجو کو گرفتار کرنے کا دعویٰ کیا ہے۔ایک پولیس ترجمان نے اپنے ایک بیان میں کہا کہ ایک مصدقہ اطلاع پر کارروائی کرتے ہوئے اونتی پورہ پولیس ،فوج کی 50 آر آر اور سی آر پی ایف کی 185 بٹالین کی ایک مشترکہ ٹیم نے کھریو علاقے کو صبح کے وقت محاصرے میں لے کر تلاشی آپریش شروع کر دیا۔انہوں نے بیان میں کہا کہ آپریشن کے دوران فورسز نے ایک باغ میں ایک شخص کو مشکوک حالت میں محاصرے سے باہر نکلنے کی کوشش کرتے ہوئے دیکھا۔موصوف ترجمان نے کہا کہ فورسز نے پھرتی کا مظاہرہ کرتے ہوئے اس شخص کو فوری طور پر دھر لیا۔انہوں نے کہا کہ گرفتار شدہ کی شناخت ساحل منظور میر ولد منظور احمد میر ساکن تلہ باغ پامپور کے بطور ہوئی ہے جو حزب المجاہدین نامی جنگجو تنظیم کا سرگرم جنگجو تھا۔بیان می کہا گیا کہ گرفتار شدہ جنگجو کی تحویل سے اسلحہ و گولہ بارود کے علاوہ کچھ قابل اعتراض مواد بھی بر آمد کیا گیا۔ (یو این آئی)
