ریاسی میں انکاونٹر شروع
جموں؍جموں وکشمیر کے ریاسی ضلع کے شکاری علاقے میں جمعے کی شام سیکورٹی فورسز اور ملی ٹینٹوں کے مابین گولیوں کا تبادلہ ہوا ہے۔معلوم ہوا ہے کہ سیکورٹی فورسز نے ایک وسیع علاقے کو محاصرے میں لے کرفرار ہونے کے راستوں پر پہرے بٹھا دئے ہیں۔اطلاعات کے مطابق ملی ٹینٹوں کی موجودگی کی ایک خاص اطلاع موصول ہونے کے بعد سیکورٹی فورسز نے جمعے کی سہ پہر ریاسی کے شکاری علاقے کو محاصرے میں لے کر تلاشی آپریشن شروع کیا۔
ذرائع نے بتایا کہ سیکورٹی فورسز کے اہلکار جوں ہی ایک مشتبہ مقام کے نزدیک پہنچے تو وہاں پر چھپے بیٹھے ملی ٹینٹوں نے فورسز پر اندھا دھند فائرنگ شروع کردی چنانچہ سلامتی عملے نے بھی پوزیشن سنبھال کر جوابی کارروائی کا آغاز کیا جس دوران شدید گولیوں کا تبادلہ شروع ہوا۔ذرائع کا کہنا ہے کہ سیکورٹی فورسز نے آس پاس علاقوں کو محاصرے میں لے کر لوگوں کے چلنے پھرنے پر پابندی عائد کی ہے۔دریں اثنا جموں پولیس نے ایکس پر جانکاری فراہم کرتے ہوئے بتایا :’چسانہ پولیس اسٹیشن کے تحت آنے والے علاقے شکاری میں سیکورٹی فورسز اور ملی ٹینٹوں کے مابین تصادم جاری ہے۔ ‘انہوں نے کہاکہ سیکورٹی فورسز نے ایک وسیع العریض علاقے کو محاصرے میں لے کر فرار ہونے کے راستوں پر پہرے بٹھا دئے ہیں۔آخری اطلاعات موصول ہونے تک علاقے میں انکاونٹر جاری تھا۔
