نگران نیوز ڈیسک
جموں// لیفٹیننٹ گورنر منوج سنہا نے کہا ہے کہ منشیات سے پاک جموں کشمیر کسی ایک فرد سے نہیں بلکہ اجتماعی کارروائی سے ابھرے گا، معاشرے کو یہ سمجھنا چاہیے کہ منشیات صرف افراد کو نہیں مارتی بلکہ شہروں کی عزت اور تقدیر کو تباہ کرتی ہیں۔ایل جی نے کہا’’آئیے ایک ایسا جموں و کشمیر بنائیں جہاں نوجوانوں کی توانائی دنیا کو روشن کرے، خود کو تباہ نہ کرے، آئیے ہم اس چیلنج کا ڈٹ کر عزم کے ساتھ مقابلہ کریں،” ۔لیفٹیننٹ گورنر سپورٹس سٹیڈیم کٹھوعہ میں ایک عوامی ریلی سے خطاب کررہے تھے، جہاں انہوں نے منشیات کے خلاف عوامی تحریک کا آغاز کیا۔لیفٹیننٹ گورنر نے ڈگری کالج تک پد یاترا کی قیادت کی۔لیفٹیننٹ گورنر نے ہر شہری سے اپیل کی کہ وہ منشیات کے استعمال کے خلاف اٹھ کھڑے ہوں اور متحد ہوں۔لیفٹیننٹ گورنر نے کہا کہ ہمارا مستقبل دستاویزات میں نہیں لکھا جائے گا بلکہ اگلے تین مہینوں میں اس عوامی تحریک کے فیصلوں کے ذریعے لکھی جائے گی۔انہوں نے کہا”ہم نے ایک منصوبہ بند 100 دن کا روڈ میپ تیار کیا ہے، چھ مرحلہ وار اقدامات، جس سے منظم عزم کو تقویت ملے گی۔ ایک مہینہ بیداری اور متحرک ہونے کو ترغیب دے گا؛ دوسرا مہینہ کمیونٹی/خاندان تک رسائی کو گہرا کرے گا اور تیسرا مہینہ پائیداری کو فروغ دے گا۔لیفٹیننٹ گورنر نے کہاکہ اگلے تین ماہ صرف مہم نہیں چلائیں گے بلکہ جموں و کشمیر میں دیرپا تبدیلی کے بیج بوئیں گے، مہم کی بنیاد ہمدردانہ بحالی ہے، ہمیں اپنی ذہنیت کو بدلنا چاہیے، نشے کے عادی مریض ہوتے ہیں اور انہیں ہماری مدد کی ضرورت ہوتی ہے،” ۔لیفٹیننٹ گورنر نے کہا”ہم سمگلروں اور مجرموں کے خلاف سخت کارروائی کریں گے، لیکن عادی لوگوں کو ہمدردی اور رحم کی ضرورت ہے، اگر کوئی نوجوان بھٹک جائے تو ہم اس کی واپسی میں مدد کریں گے” ۔لیفٹیننٹ گورنر نے پولیس حکام کو ہدایت کی کہ وہ تمام تھانوں میں منشیات فروشوں کی فہرستیں تیار کریں اور 30 دنوں کے اندر منشیات کے نیٹ ورک کو ختم کرنے کے لیے فیصلہ کن کارروائی کریں۔ انہوں نے پولیس حکام سے کہا کہ وہ منشیات کے سنڈیکیٹ کے مکمل خاتمے کے لیے ایک توجہ مرکوز اور وقت کا پابند طریقہ اختیار کریں۔منشیات کے سنڈیکیٹس کو آنے والے کریک ڈائون کے بارے میں انتباہ کرتے ہوئے، لیفٹیننٹ گورنر نے کہا کہ حال ہی میں مطلع کردہ ایک اہم معیاری آپریٹنگ طریقہ کار، سمگلروں کو ان کے پاسپورٹ، ڈرائیونگ لائسنس، آدھار کارڈ، اور اسلحہ لائسنس منسوخ کرکے بے رحمی سے کچل دے گا۔لیفٹیننٹ گورنر نے کہا”این ڈی پی ایس ایکٹ کے تحت، ہم تمام منقولہ اور غیر منقولہ اثاثوں کو ضبط کریں گے، بینک اکائونٹس کو منجمد کریں گے، اور مکمل مالی تحقیقات شروع کریں گے۔ میں جموں کشمیر کے لوگوں کو یقین دلانا چاہتا ہوں کہ کوئی بھی مجرم انصاف سے نہیں بچ سکے گا،” ۔لیفٹیننٹ گورنر نے خواتین کے سیلف ہیلپ گروپس پر زور دیا کہ وہ منشیات کے استعمال کے کیسوں کی نگرانی اور اپنے علاقوں میں ہونے والی سرگرمیوں کے بارے میں سینئر حکام کو آگاہ کرنے کے لیے خواتین کی ویجیلنس اسکواڈ تشکیل دیں۔انہوں نے کہا کہ حکومت اور معاشرے کو نگرانی کے لیے متحد ہونا چاہیے، انسداد منشیات کی حمایت میں ریلی نکالنی چاہیے، اور منشیات سے پاک گائوں اور قصبوں کی آبیاری کرنا چاہیے۔ لیفٹیننٹ گورنر نے کہا کہ ہم نے اپنی پولیس اور ایجنسیوں کو منشیات کے سنڈیکیٹس کو ختم کرنے کا مکمل اختیار دیا ہے۔لیفٹیننٹ گورنر نے کہا کہ زندگی کے مقصد کو سمجھنے والا نوجوان منشیات کے خلاف ہمارا سب سے مضبوط ہتھیار بن جائے گا ۔ انہوں نے این جی اوز اور کارکنوں کو نچلی سطح پر کوششوں اور آرا کو آگے بڑھانے کی ذمہ داری سونپی۔
