نگران نیوز
اننت ناگ// وزیر اعلیٰ عمر عبداللہ نے منگل کو لیفٹیننٹ گورنر منوج سنہا سے اپیل کی کہ وہ رام بن کے نوجوان کی موت کے پیچھے لوگوں کے خلاف سخت کارروائی کریں، تاکہ یہ سخت پیغام دیا جائے کہ مرکز کے زیر انتظام علاقے میں جنگل راج کو برداشت نہیں کیا جائے گا۔عبداللہ نے بجبہاڑہ میں ایک تقریب سے خطاب کرتے ہوئے کہا’’ ہم چاہتے ہیں کہ ماحول اچھا رہے، لیکن کچھ لوگ ہیں یہاں جنگل راج بنانا چاہتے ہیں، وہ یہاں کے ماحول کو خراب کرنا چاہتے ہیں اور فرقہ وارانہ تنازعہ پیدا کرنا چاہتے ہیں‘‘۔ان کا کہنا تھا کہ ان کی حکومت کا مقصد جموں و کشمیر میں ایک "نئے مرحلے” کا آغاز کرنا ہے جس میں پرامن ماحول اور مستحکم حالات ہوں۔ عبداللہ نے کہا کہ کچھ عناصر موجودہ سکون کو خراب کرنے کی کوشش کر رہے ہیں۔انہوں نے کہا کہ "میری حکومت امن و امان کی خرابی کو روکنے کے لیے سخت اقدامات کرے گی۔”انہوں نے کہا کہ موجودہ حکومت اس طرح کی بدامنی اور لاقانونیت کو برداشت نہیں کرے گی۔وزیر اعلیٰ نے لیفٹیننٹ گورنر سے اپیل کی کہ وہ قتل میں ملوث افراد اور ماحول کو خراب کرنے کی کوشش کرنے والوں کے خلاف سخت کارروائی کریں، "تاکہ یہ پیغام جائے کہ موجودہ حکومت جموں و کشمیر میں اس غنڈہ گردی اور اس جنگل راج کی اجازت نہیں دے گی” ۔
