نگران نیوز
سری نگر// 14 سے 20 اپریل 2026 تک جموں و کشمیر کے مرکزی علاقے میں فائر سروس ہفتہ کے آغاز کے ساتھ فائر اینڈ ایمرجنسی سروسز بٹہ مالو کے ہیڈ کوارٹر میں فائر سروس ڈے منایا گیا۔ اس پروگرام کی قیادت ڈائریکٹر فائر اینڈ ایمرجنسی سروسز آلوک کمار نے کی، جنہوں نے افسران اور اہلکاروں کے ساتھ مل کر 1944 کے بمبئی ڈاک دھماکے کے شہیدوں کو خراج عقیدت پیش کیا، جسے ہر سال فائر سروس ڈے کے طور پر منایا جاتا ہے۔ ڈیوٹی کے دوران جان کی بازی ہارنے والے فائر فائٹرز کی یاد میں دو منٹ کی خاموشی بھی اختیار کی گئی۔تقریب سے خطاب کرتے ہوئے ڈائریکٹر نے کہا کہ فائر سروس ہفتے کا مقصد آگ سے بچائو، تیاریوں اور عوامی آگاہی کو مضبوط بنانا ہے۔ اس سال کا تھیم "محفوظ سکول، محفوظ ہسپتال اور فائر سیفٹی اویئر سوسائٹی – آگ سے بچا کے لیے ایک ساتھ” ہے۔انہوں نے بتایا کہ 2025 کے دوران محکمہ نے 6,039 فائر کالز، 59 ریسکیو آپریشنز اور 53 فرضی الارم کا جواب دیا۔ 322 فائر ٹینڈرز اور کوئیک ریسپانس وہیکلز اور 2,157 اہلکاروں کی خدمات کے ساتھ، محکمہ تقریباً 5,000 کروڑ روپے کی املاک کو بچانے میں کامیاب ہوا، جب کہ تقریبا ً300 کروڑ روپے کا نقصان ہوا۔ڈائریکٹر نے کہا کہ آگ لگنے کے واقعات میں 1,994 واقعات کی کمی واقع ہوئی ہے، جو پچھلے سال کے مقابلے میں تقریباً 25 فیصد کی کمی کی نشاندہی کرتی ہے، اس بہتری کی وجہ احتیاطی تدابیر اور عوامی آگاہی میں اضافہ ہے۔کمیونٹی کی شرکت پر روشنی ڈالتے ہوئے، انہوں نے کہا کہ "ہر گھر فائر فائٹر” جیسے اقدامات کے تحت 10,794 بیداری پروگرام پورے مرکز کے زیر انتظام علاقے میں 10.7 لاکھ سے زیادہ لوگوں تک پہنچے۔ انہوں نے مزید کہا کہ حفاظتی اصولوں کی تعمیل کو یقینی بنانے کے لیے ہسپتالوں، سکولوں، ہوٹلوں اور تجارتی اداروں میں 3,728 فائر سیفٹی آڈٹ کیے گئے۔محکمہ نے آفات کے رد عمل ، بشمول حالیہ سیلاب کے دوران بچائو اور پانی کی نکاسی کی کارروائیوں کے ساتھ ساتھ امرناتھ جی یاترا 2025 کے لیے آگ سے حفاظت کے انتظامات میں بھی اہم کردار ادا کیا۔فائر سروس ہفتہ کے دوران، محکمہ آگ کی حفاظت اور ہنگامی تیاریوں کو فروغ دینے کے لیے پورے جموں و کشمیر میں بیداری مہم، موک ڈرل، انخلا کی مشقیں، لیکچرز اور لائیو مظاہرے منعقد کرے گا۔ عوامی تعاون کی اپیل کرتے ہوئے، ڈائریکٹر نے شہریوں پر زور دیا کہ وہ آگ سے حفاظت کے بنیادی طریقوں کو اپنائیں اور آگ سے محفوظ معاشرے کی تعمیر میں اپنا حصہ ڈالیں، اس کے مقصد کے تحت محکمے کے عزم کو دہراتے ہوئے: "ہم بچانے کی خدمت کرتے ہیں۔”
