نگران نیوز
سری نگر// محکمہ موسمیات کے مطابق جمعرات اور جمعہ کی درمیانی شب وادی کے بیشتر مقامات پر جم کر بارش ہوئی جبکہ اس دوران رازدان ٹاپ گریز میں برفباری کی وجہ سے گریز روڑ بند کردیا گیا۔جمعہ کی صبح اور دن میں بھی بارش ہوئی جبکہ شام کے بعد شہر سرینگر میں ایک بار پھر بارشوں کا سلسلہ شروع ہوا۔محکمہ کا کہنا ہے کہ اتوار تک کئی مقامات پر وقفے وقفے سے ہلکی بارش اور گرج چمک کے ساتھ بارش کا امکان ہے۔محکمہ موسمیات کے اعداد و شمار سے پتہ چلتا ہے کہ سری نگر میں اس مدت کے دوران 2.6 ملی میٹر بارش ریکارڈ کی گئی۔ دیگر علاقوں کے علاوہ، جنوبی کشمیر کے قاضی گنڈ میں 4.4 ملی میٹر، شمالی کشمیر کے کپواڑہ میں 6 ملی میٹر، جبکہ گلمرگ میں 7 ملی میٹر اورجنوبی کشمیر کے سیاحتی مقام پہلگام میں 5.4 ملی میٹر بارش ہوئی۔دریں اثنا، کشمیر ڈویژن میں رات کا درجہ حرارت کئی مقامات پر معمول سے 0-3 ڈگری سینٹی گریڈ زیادہ رہا۔ محکمہ موسمیات نے کہا کہ 19 اپریل تک پورے کشمیر میں بارشی موسم کا امکان ہے۔ محکمہ موسمیات نے کہا کہ یہ موسمی سرگرمیاں بنیادی طور پر صبح اور شام یا دیر شام کے اوقات میں ہونے کا امکان ہے۔ اس دوران 40-50 کلومیٹر فی گھنٹہ کی رفتار سے تیز ہوائیں چلنے اور چند مقامات پر ژالہ باری کا امکان بھی ظاہر کیا گیا ہے۔20 سے 24 اپریل تک موسم کی صورتحال بہتر ہونے کی توقع ہے، پورے خطے میں عموماً خشک موسم رہنے کا امکان ہے۔ خشک اسپیل 25 اور 26 اپریل کو بھی جاری رہ سکتا ہے، حالانکہ ہلکی بارش یا گرج چمک کے ساتھ تیز ہوائوں کے ساتھ ہلکی بارشیں ہوسکتی ہیں۔
