نگران نیوز
سری نگر// ہفتہ کی صبح کشمیر کے عازمین کا پہلا دستہ سعودی عرب روانہ ہوا۔علی الصبح سے ہی سینکڑوں افراد سرینگر کے حج ہائوس بمنہ کے باہر اپنے رشتہ داروں اور دوستوں کو الوداع کرنے کے لیے جمع ہوئے جنہیں اس سال حج کے لیے منتخب کیا گیا تھا۔حج کمیٹی کے ایگزیکٹو آفیسر ڈاکٹر شجاعت احمد قریشی نے بتایا کہ پہلے دن سرینگر سے کل 431 عازمین کو لے کر تین پروازیں روانہ ہونے والی ہیںجن میں 230 مرد اور 201 خواتین شامل ہیں۔ انہوں نے کہا کہ پہلی پرواز میں 79 مرد اور 66 خواتین، دوسری میں 78 مرد اور 65 خواتین جبکہ تیسری پرواز میں 73 مرد اور 70 خواتین سوار ہیں۔انہوں نے مزید کہا کہ روانگی کے عمل کو ہموار اور منظم طریقے سے یقینی بنانے کے لیے نقل و حمل، سامان کی ہینڈلنگ، میڈیکل سکریننگ اور دستاویزات کے انتظامات پہلے ہی سے کیے گئے تھے۔انہوں نے کہا کہ ہم نے عازمین کے آرام اور سہولت کے لیے تمام ضروری انتظامات کر لیے ہیں۔آج کے پہلے فلائٹ شیڈول کے لیے عازمین سے کہا گیا ہے کہ وہ اپنے مقررہ اوقات کے مطابق حج ہاس، بمنہ، سرینگر میں رپورٹ کریں۔ عازمین حج کے پہلے دستہ کو وزیر اعلیٰ عمر عبداللہ نے ہوائی اڈے پر رخصت کیا۔جموں و کشمیر کے کل 4,764 عازمین اس سال حج پر جائیں گے۔وزیراعلی کے دفتر نے X پر ایک پوسٹ میں کہا۔ "انہوں نے عازمین کے لیے ایک محفوظ اور روحانی طور پر مکمل سفر کے لیے نیک خواہشات کا اظہار کیا اور ان سے جموں و کشمیر کے امن، ترقی اور خوشحالی کے لیے دعا کرنے کی درخواست کی،” ۔اس میں کہا گیا ہے کہ چیف منسٹر نے عہدیداروں کو تمام عازمین حج کے لیے ہموار سہولت اور مناسب انتظامات کو یقینی بنانے کی ہدایت دی، سفر کے ہر مرحلے پر ہموار رابطہ کاری، مسافروں کی سہولت اور بروقت مدد پر توجہ دی جائے۔
