نگران نیوز
سری نگر// جموں و کشمیر انتظامیہ نے ہفتہ کو کالعدم جماعت اسلامی (جے آئی)اور اس کے فلاح عام ٹرسٹ سے منسلک 58 سکولوں کی انتظامی کمیٹیوں کو اپنے قبضے میں لینے کا حکم دیا۔ یہ کارروائی منفی انٹیلی جنس رپورٹس اور سکولوں کے انتظامی جواز کے ختم ہونے کے بعد کی گئی ہے۔محکمہ سکول ایجوکیشن نے وزارت داخلہ کے نوٹیفیکیشن پر عملدر آمد کیا جس میں جماعت اسلامیکو غیر قانونی سرگرمیاں(روک تھام) ایکٹ (UAPA) کے تحت غیر قانونی انجمن قرار دیا گیا تھا۔ایک اہلکار نے بتایا، یہ 58 فعال سکولوں کا تعلق کالعدم تنظیم یا اس کے ٹرسٹ سے بالواسطہ یا بلاواسطہ پایا گیا۔عہدیداروں نے مزید کہا کہ ڈپٹی کمشنرز کو ہدایت دی گئی ہے کہ وہ سکولوں کا کنٹرول سنبھالیں اور نئی، تصدیق شدہ کمیٹیاں تجویز کریں تاکہ یہ یقینی بنایا جاسکے کہ طلبا کا تعلیمی مستقبل متاثر نہ ہو۔حکام نے کہا کہ اس اقدام کا مقصد قومی تعلیمی پالیسی (این ای پی)کے اصولوں کے مطابق بغیر کسی رکاوٹ کے معیاری تعلیم کو برقرار رکھنا ہے۔ انہوں نے کہا کہ تمام 58 سکولوں میں سرکاری ٹیمیں تعینات کر دی گئی ہیں۔
