نگران نیوز
سرینگر؍ نیشنل انویسٹی گیشن ایجنسی (این آئی اے) نے جمعہ کو وسطی کشمیر کے ضلع بڈگام میں سال 2020 میں دہشت گردی سے متعلق درج ایک کیس میں نامزد ملزم کی زمین کو اٹیچ کیا ہے۔ حکام نے بتایا کہ یہ کارروائی این آئی اے کی ایک ٹیم نے انجام دی، جس کی قیادت ڈپٹی سپرنٹنڈنٹ آف پولیس پنچکچ اگروال کر رہے تھے۔ ایک قومی خبر رساں ادارے کی ایک نیوز رپورٹ کے مطابق ٹیم نے بڈگام کے ایس کے باغ علاقے میں واقع 11.5 مرلہ زمین کو ضبط کیا۔ حکام کے مطابق یہ جائیداد سروے نمبر 25 کے تحت درج ہے اور یہ تفصل حسین پاریمو، ولد عبدالرشید پاریمو کی ملکیت ہے۔ وہ سرینگر کے نوگام علاقے کی شیخ العالم کالونی کا رہائشی ہے۔یہ ضبطی مقامی انتظامیہ کی موجودگی میں عمل میں لائی گئی، جن میں بی کے پورہ کے نائب تحصیلدار عاشق حسین اور پولیس اسٹیشن نوگام کے ایس ایچ او شامل تھے۔ ایجنسی 2020 سے اس کیس کی تفتیش کر رہی ہے، جو خطے میں دہشت گردی کے نیٹ ورک اور اس سے جڑی مالی سرگرمیوں کے خلاف کارروائی کا حصہ ہے۔واضح رہے کہ گزشتہ روز بھی اسی طرح کی ایک کارروائی میں این آئی اے نے جنوبی کشمیر کے پلوامہ ضلع میں دہشت گردی کیس میں نامزد ایک ملزم کی تین کنال چار مرلہ زمین اٹیچ کی۔
