جموں:بھارتیہ جنتا پارٹی (بی جے پی) کی طلبہ شاخ ‘اکھل بھارتیہ ودیارتھی پریشد’ (اے بی وی پی) نے یوم آزادی کے موقع پر وادی کشمیر کے 1000 گائوں میں ترنگا لہرانے کا اعلان کیا ہے۔اے بی وی پی کے ایک لیڈر نے بتایا: ‘ہماری آزادی کے 75 سال پورے ہو رہے ہیں۔ اس کو ایک یادگاری دن بنانے کے لئے اے بی وی پی جموں و کشمیر کے 3305 گائوں میں ترنگا لہرائے گی’۔ان کا مزید کہنا تھا: ‘سب سے بڑی بات یہ ہے کہ وادی کشمیر میں اس بار ہمارے کارکن لوگوں کے ساتھ مل کر ایک ہزار سے زیادہ گائوں میں ترنگا لہرائیں گے’۔مذکور لیڈر نے دعویٰ کیا کہ وادی میں دفعہ 370 اور دفعہ 35 اے ہٹنے کے بعد ملی ٹینسی میں کافی گراوٹ آئی ہے نیز پتھر بازی نہیں ہو رہی ہے۔انہوں نے کہا: ‘اس سے صاف ظاہر ہوتا ہے کہ کشمیری نوجوان بھارت کے ساتھ جڑ رہے ہیں۔ وہ بھارت کو اپنا ملک مان کر آزادی کے 75 سال مکمل ہونے کا جشن منائیں گے’۔یو این آئی
