نگران نیوز
سری نگر//جموں و کشمیر میں منشیات کے نیٹ ورکس کے خلاف سخت کریک ڈائون کے ایک حصے کے طور پر مبینہ طور پر منشیات کی غیر قانونی اسمگلنگ سے حاصل کی گئی تقریبا 2 کروڑ روپے کی جائیدادوں کو ضبط کیا گیا ہے۔پولیس کے ایک ترجمان نے بتایا کہ سری نگر پولیس نے جاری نشا مکت جموں و کشمیر ابھیان کے تحت منشیات سے متعلق سرگرمیوں میں ملوث افراد کی متعدد غیر منقولہ جائیدادوں کو ضبط کیا ہے۔ترجمان نے بتایا کہ پہلے کیس میں، بمنہ پولیس سٹیشن نے یہاں بمنہ میں فردوس کالونی کے رہنے والے ایک مبینہ منشیات فروش مدثر احمد پیر عرف ساحل عرف ڈوگے کی تقریبا 1.5 کروڑ روپے کی غیر منقولہ جائیداد ضبط کی۔انہوں نے کہا کہ منسلک جائیداد میں ایک دو منزلہ رہائشی مکان اور تقریباً چار مرلہ اراضی شامل ہے۔ انہوں نے مزید کہا کہ تحقیقات سے معلوم ہوا کہ یہ جائیداد منشیات کی غیر قانونی اسمگلنگ سے حاصل ہونے والی رقم سے حاصل کی گئی تھی۔ایک الگ کارروائی میں سری نگر پولیس نے شمالی کشمیر کے کپواڑہ ضلع میں دلدار کرناہ کے رہنے والے مبینہ منشیات فروش شفیق احمد خواجہ کا تقریبا 50 لاکھ روپے مالیت کا رہائشی مکان اور زمین ضبط کر لی۔
