پی آئی بی
سرینگر؍یکم؍جون/ محترمہ مونیکا دھامی نے آج سرینگر میں پرنسپل کمشنر انکم ٹیکس کا عہدہ سنبھال لیا۔ وہ انڈین ریونیو سروس 2001 بیچ کی افسر ہیں اور اپنی پیشہ ورانہ زندگی میں متعدد اہم اور متنوع ذمہ داریوں پر خدمات انجام دے چکی ہیں، جن میں محکمہ اقتصادی امور میں پالیسی سازی کا اہم منصب، محکمہ انکم ٹیکس میں کارپوریٹ اور تنخواہوں سے متعلق تشخیصی ذمہ داریاں اور اعلیٰ ترین سول سروسز تربیتی اکیڈمی ایل بی ایس این اے اے میں نئے شامل ہونے والے سول سرونٹس کی چیف ٹرینر کے طور پر ایک نمایاں مدت شامل ہے۔ موجودہ تنظیمی درجہ بندی کے مطابق محترمہ دھامی اس خطے میں محکمہ انکم ٹیکس کی اعلیٰ ترین رینکنگ افسر ہیں اور ان کے دائرۂ اختیار میں جموں و کشمیر یو ٹی اور لداخ یوٹی کا وسیع علاقہ شامل ہے۔ حکومت ہند نے انہیں حکمتِ عملی کے تحت سرینگر میں تعینات کیا ہے تاکہ ٹیکس دہندگان، ٹیکس ماہرین، تجارتی و صنعتی تنظیموں اور دیگر متعلقہ فریقوں کے ساتھ قریبی رابطے میں رہتے ہوئے خطے میں ایک منصفانہ، شفاف اور ٹیکس دہندگان کے فوافق ٹیکس نظام کو مزید مضبوط بنایا جا سکے۔محترمہ دھامی کا سرینگر میں محکمہ کے افسران اور ملازمین نے باضابطہ استقبال کیا اور اپنی پہلی ملاقات کے دوران انہوں نے محکمہ میں ہونے والی اہم اور جدید تبدیلیوں پر زور دیا، جن میں قانون کے نفاذ میں ٹیکنالوجی کا استعمال، فیس لیس طریقہ کار اور تعمیل میں آسانی شامل ہیں۔ انہوں نے اس بات کا بھی اعادہ کیا کہ رضاکارانہ تعمیل ٹیکس نظام کی بنیاد ہے، اور افسران کو ہدایت دی کہ وہ ٹیکس دہندگان اور محکمہ کے درمیان اعتماد اور تعاون کی فضا کو مزید مستحکم بنانے کے لیے کام کریں۔محترمہ دھامی نے اس بات پر بھی زور دیا کہ عوامی شکایات کے ازالے، ٹیکس دہندگان تک رسائی کے پروگراموں، آگاہی مہمات اور مختلف اسٹیک ہولڈرز کے ساتھ مشاورت پر خصوصی توجہ دی جائے گی، تاکہ عوام کو درپیش مسائل اور خدشات کا بروقت اور مؤثر حل ممکن بنایا جا سکے۔لندن اسکول آف اکنامکس کی ایک سابق طالبہ محترمہ مونیکا دھامی نے پبلک پالیسی میں ماسٹرز کی ڈگری حاصل کی ہے اور اپنے بیوروکریٹک کیرئیر کے دوران مقامی ثقافتی ورثے اور ثقافتی مقامات کے تحفظ کی مضبوط حامی رہی ہیں۔ نئی دہلی میں ڈائریکٹوریٹ آف ٹریننگ میں ایڈیشنل ڈائریکٹر جنرل (ٹریننگ) کے اہم عہدے پر خدمات انجام دینے کے بعد، محترمہ مونیکا دھامی نے یہ عزم بھی ظاہر کیا ہے کہ وہ محکمہ کے عملے کی مہارتوں میں اضافے پر خصوصی توجہ دیں گی، تاکہ وہ عوامی خدمات کے متحرک ماحول میں اپنی پیشہ ورانہ اور ذاتی ترقی کو مزید فروغ دے سکیں۔
