نگران نیوز
سری نگر//شمالی ضلع کپوارہ میںحد متارکہ پر واقع کیرن میں اتوار کی شام دیر گئے موسم نے اچانک کروٹ لی اور علاقہ میں طوفانی بارشو ں اور ژالہ باری کا سلسلہ شروع ہوا جس کی وجہ سے مقامی ندی نالو ں میں تغیانی آگئی۔علاقہ میں اس قدر ژالہ باری ہوئی کہ پورے علاقہ نے سفید چادر اوڑھ لی ۔کیرن کے پاترو علاقہ میں پیر کی سہ پہر تباہ کن ژالہ باری کے نتیجے میں فصلو ں کو شدید نقصان پہنچا ۔ ضلع کے راشن پورہ ،میلیال، سندر پورہ اوردرد پورہ علاقوں میں اتوار دوران شب قہر انگیز ژالہ باری ہوئی۔کیرن اور راشن پورہ کے لوگو ں نے بتایا کہ قہر انگیز ژالہ باری کی وجہ سے جہا ں کھڑی فصلو ں اور میو ہ باغات کو زبردست نقصان پہنچا ۔راشن پورہ میں پیر کے روز بھی ژالہ باری ہوئی۔اس سے قبل ضلع کے لولاب کے ہرل ماور ،زچلڈار اور کرالہ پورہ علاقوں میں بھی قہر انگیز ژالہ باری نے تباہی مچا دی تھی ۔ادھر پیر کی سہ پہر کو ضلع کے تارت پورہ ،درایل ،آلوسہ ، اور دیگر علاقوں میں اس وقت طوفانی بارشوں اور ژالہ باری کا سلسلہ شروع ہوا جب کسان دھان کی پنیری لگانے میں مصروف تھے ۔ان علاقوں میں ژالہ باری کی وجہ سے فصلو ں اور میوہ باغات کے ساتھ ساتھ سبزیو ں کو بھی شدید نقصان پہنچا ۔
