نگران نیوز
سرینگر// اس بات پر زور دیتے ہوئے کہ تنازعات اور غیر یقینی صورتحال کے موجودہ عالمی ماحول میں بات چیت اور سفارت کاری پہلے سے کہیں زیادہ اہم ہو گئی ہے،وزیر اعظم نریندر مودی نے منگل کو فلسطین کے لئے2 ریاستی حل کے لیے ہندوستان کی حمایت کا اعادہ کیا۔ انڈونیشیا کے اپنے2روزہ دورے کے دوران جکارتہ میں خطاب کرتے ہوئے وزیر اعظم نے کہا کہ ہندوستان کا ماننا ہے کہ بین الاقوامی تنازعات کے حل کے لئے پرامن مذاکرات ہی واحد پائیدار راستہ ہے۔وزیر اعظم نے کہاکہ عالمی بحران کے اس دور میں، ہندوستان کا ماننا ہے کہ بات چیت اور سفارت کاری کا کردار پہلے سے کہیں زیادہ اہم ہو گیا ہے۔مسئلہ فلسطین کا ذکر کرتے ہوئیوزیر اعظم نریندر مودی نے کہا کہ فلسطین کے موضوع پر ہم دو ریاستی حل اور طویل مدتی امن کی حمایت کرتے ہیں۔دو طرفہ تعلقات کو اجاگر کرتے ہوئے وزیر اعظم نے کہا کہ ہندوستان اور انڈونیشیا تعاون کے ایک نئے دور میں داخل ہو رہے ہیں۔انہوں نے کہاکہ 2018 میں قائم ہونے والی ہماری جامع اسٹریٹجک پارٹنرشپ آج ایک نئی چھلانگ لگا رہی ہے۔ ہم ترقی، سلامتی، ٹیکنالوجی، ثقافت اور تعلیم میں اہم اقدامات کر رہے ہیں۔ ہم ہر شعبے میں اہم اقدامات کر رہے ہیں۔مودی نے ہندوستان،انڈونیشیا تعلقات کے مستقبل کو امید افزا قرار دیا اور کہا کہ دونوں ممالک تعاون کے ایک نئے دور کی دہلیز پر کھڑے ہیں۔انہوں نے کہا کہ ایک سنہری دور ہمارے دونوں دروازوں پر دستک دے رہا ہے۔ ہماری تاریخ میں ایک مشترکہ ثقافت ہے، ہمارے حال میں ایک مشترکہ ایمان ہے، اور ہمارے مستقبل میں مشترکہ خوشحالی ہے۔
