نگران نیوز
سری نگر //جموں و کشمیر میں مسلسل موسلادھار بارشوں کے باعث دریاؤں اور ندی نالوں میں پانی کی سطح تیزی سے بلند ہو رہی ہے، جس کے پیش نظر محکمہ آبپاشی و فلڈ کنٹرول اور محکمہ موسمیات نے کئی علاقوں کے لیے الرٹ جاری کیا ہے۔ حکام کے مطابق دریائے جہلم سنگم اور رام منشی باغ کے مقامات پر سیلابی اعلان کی سطح عبور کر سکتا ہے۔ سنگم،رام منشی باغ اور عشم کے مقامات پر پانی کی سطح مسلسل بڑھ رہی ہے، جبکہ ولر جھیل میں بھی پانی کی سطح بڑھنے کا رجحان دیکھا گیا۔دریائے جہلم کی معاون ندیوں میں بھی پانی کی سطح میں اضافہ ریکارڈ کیا گیا۔ ویشو نالہ کھڈونی وانی ،لدر نالہ بٹکوٹ،رمبی آرا نالہ واچی ،دودھ گنگا برزلہ میں کمی اور سندھ نالہڈوڈرہامہ میں پانی کی سطح مستحکم رہی۔انتظامیہ نے نشیبی علاقوں میں رہنے والے شہریوں کو صورتحال پر گہری نظر رکھنے، غیر ضروری نقل و حرکت سے گریز کرنے اور ضرورت پڑنے پر فوری حفاظتی اقدامات اختیار کرنے کی ہدایت دی ہے۔ادھر ادھم پور میں دریائے توی نے دوپہر ساڑھے بارہ بجے فلڈ الرٹ لیول عبور کر لیا۔ حکام کے مطابق دریا میں پانی کی سطح 16.65 فٹ تک پہنچ گئی، جبکہ الرٹ لیول 15 فٹ مقرر ہے۔ دریا کا ڈینجر لیول 20 فٹ اور انخلا لیول 23.4 فٹ مقرر کیا گیا ہے۔ صرف تیس منٹ کے دوران پانی کی سطح میں 6.65 فٹ کا غیر معمولی اضافہ ریکارڈ کیا گیا، جسے شدید بارشوں کا نتیجہ قرار دیا گیا ہے۔محکمہ موسمیات نے پیش گوئی کی ہے کہ جمعرات کو سانبہ، کٹھوعہ، ادھم پور اور چناب ویلی کے اضلاع میں مزید بارش متوقع ہے، جو بعد ازاں جنوبی کشمیر تک پھیل سکتی ہے۔ محکمہ کے مطابق جمعہ کو ایک فعال مغربی ہواؤں کے سلسلے کے زیر اثر ایک اور بارش کا دور جموں و کشمیر کو متاثر کر سکتا ہے۔حکام نے بتایا کہ تقریباً تمام بڑے دریا اور ندی نالے طغیانی کی حالت میں بہہ رہے ہیں، جبکہ اچانک آنے والے سیلاب سے کئی نشیبی علاقوں میں آبادی، مکانات، دکانیں اور دیگر بنیادی ڈھانچے کو نقصان پہنچا ہے۔محکمہ موسمیات کے اعداد و شمار کے مطابق گزشتہ 24 گھنٹوں کے دوران ریاسی میں سب سے زیادہ 119.5 ملی میٹر بارش ریکارڈ کی گئی، جبکہ کٹرا (97.4 ملی میٹر)، رام بن (71.5)، جموں (60.6)، بٹوت (60.4)، ادھم پور (53.2)، بنیہال (53.0) اور دیگر علاقوں میں بھی شدید بارش ہوئی۔وادی کشمیر میں قاضی گنڈ میں 73.3 ملی میٹر بارش ریکارڈ کی گئی، جبکہ پہلگام (60.2)، کوکرناگ (47.9)، گلمرگ (39)، سنگم (37)، ویر ناگ (35.3)، اونتی پورہ (31.2)، بارہمولہ (30.5) سمیت بیشتر علاقوں میں بھی اچھی خاصی بارش درج کی گئی۔
