نگران نیوز
سری نگر//لیفٹیننٹ گورنر جموں و کشمیر منوج سنہا نے جمعہ کو وسطی کشمیر کے ضلع بڈگام کے لولی پورہ، بیروہ کا دورہ کرکے اننت ناگ دہشت گردانہ حملے میں فرض کی ادائیگی کے دوران جان بحق ہونے والے جموں و کشمیر پولیس کے ہیڈ کانسٹیبل عاشق حسین قریشی کے اہلِ خانہ سے ملاقات کی۔ انہوں نے شہید کے لواحقین سے دلی تعزیت اور ہمدردی کا اظہار کرتے ہوئے یقین دلایا کہ حکومت اس مشکل گھڑی میں ان کے ساتھ مضبوطی سے کھڑی ہے اور شہید کے خاندان کو ہر ممکن تعاون فراہم کیا جائے گا۔یو این ایس کے مطابق دورے کے دوران لیفٹیننٹ گورنر نے فوت شدہ پولیس اہلکار کو زبردست خراجِ عقیدت پیش کرتے ہوئے کہا کہ ہیڈ کانسٹیبل عاشق حسین قریشی نے دہشت گردی کے خلاف جنگ میں اپنی جان کا نذرانہ پیش کرکے فرض شناسی، جرات اور حب الوطنی کی اعلیٰ مثال قائم کی ہے۔ انہوں نے کہا کہ قوم ایسے بہادر سپوتوں کی قربانیوں کو کبھی فراموش نہیں کرے گی اور ان کا نام ہمیشہ عزت و احترام کے ساتھ یاد رکھا جائے گا۔منوج سنہا نے کہا کہان کی بہادری، ایثار، فرض سے غیر متزلزل وابستگی اور مادرِ وطن کے لیے قربانی آنے والی نسلوں کے لیے مشعلِ راہ رہے گی۔ انہوں نے کہا کہ امن، ترقی اور خوشحالی کے راستے میں اپنی جانیں قربان کرنے والے پولیس اہلکار اور سیکورٹی فورسز کے جوان جموں و کشمیر کے حقیقی ہیرو ہیں اور انہی کی قربانیوں کی بدولت دہشت گردی کے خلاف لڑائی میں اہم کامیابیاں حاصل ہو رہی ہیں۔لیفٹیننٹ گورنر نے شہید کے اہلِ خانہ کو یقین دلایا کہ انتظامیہ ان کی فلاح و بہبود، عزت اور وقار کو یقینی بنانے کے لیے ہر ممکن قدم اٹھائے گی۔ انہوں نے خصوصی طور پر شہید کے بیٹے کے مستقبل کا ذکر کرتے ہوئے کہا کہ حکومت اس کی تعلیم مکمل ہونے تک مکمل سرپرستی کرے گی اور تعلیم مکمل کرنے کے بعد اسے ہمدردانہ بنیادوں پر سرکاری ملازمت فراہم کرنے کے لیے تمام ضروری اقدامات کیے جائیں گے تاکہ خاندان کو کسی قسم کی مشکل کا سامنا نہ کرنا پڑے۔یو این ایس کے مطابق انہوں نے کہا کہ حکومت پولیس اہلکارکے اہلِ خانہ کی دیکھ بھال کو اپنی ذمہ داری سمجھتی ہے اور ملک کی خاطر جانوں کا نذرانہ پیش کرنے والے بہادروں کے خاندانوں کو کبھی تنہا نہیں چھوڑا جائے گا۔ انہوں نے کہا کہ پوری قوم شہید عاشق حسین قریشی کے اہلِ خانہ کے ساتھ کھڑی ہے اور ان کی قربانی کو ہمیشہ قدر و احترام کی نگاہ سے دیکھا جائے گا۔لیفٹیننٹ گورنر نے دہشت گردی کے خلاف جاری کارروائیوں کا ذکر کرتے ہوئے کہا کہ وزیر اعظم نریندر مودی کی قیادت میں جموں و کشمیر پولیس، بھارتی فوج اور مرکزی مسلح پولیس فورسز کے درمیان بہترین تال میل کے ساتھ دہشت گردی کے نیٹ ورک کو ختم کرنے کی کارروائیاں مسلسل جاری ہیں۔ انہوں نے کہا کہ گزشتہ چند برسوں کے دوران دہشت گردی کے ڈھانچے کو کمزور کرنے میں نمایاں کامیابیاں حاصل ہوئی ہیں اور حکومت اس وقت تک اپنی کوششیں جاری رکھے گی جب تک جموں و کشمیر سے دہشت گردی کا مکمل خاتمہ نہیں ہو جاتا۔
