فاروق راتھر
سرینگر؍۲۵؍جولائی؍ آنگن واڑی ورکرس اینڈ ہیلپرس یونین جموں و کشمیر، جو آل انڈیا فیڈریشن آف آنگن واڑی ورکرس اینڈ ہیلپرس اور سینٹر آف انڈین ٹریڈ یونینز سے وابستہ ہے، کے ایک وفد نے سینئر یونین رہنما تسلیمہ سبحان کی رہائش گاہ پر جا کر ان کے اہلِ خانہ سے تعزیت کا اظہار کیا۔ تسلیمہ سبحان کا دو روز قبل علالت کے بعد انتقال ہوگیا تھا۔وفد میں یونین کی صدر حنیفہ میر، جنرل سیکریٹری ثریا جبین، نائب صدر شفیقہ اختر اور سینئر رہنما لطیفہ گنائی شامل تھیں۔اس موقع پر وفد نے مرحومہ کو زبردست خراجِ عقیدت پیش کرتے ہوئے کہا کہ تسلیمہ سبحان ایک مخلص، بے باک اور متحرک رہنما تھیں جنہوں نے اپنی پوری زندگی آنگن واڑی ورکروں اور ہیلپروں کے حقوق کے تحفظ اور ان کی فلاح و بہبود کے لیے وقف کر رکھی تھی۔یونین رہنماؤں نے کہا کہ مرحومہ خاص طور پر ضلع سرینگر میں آئی سی ڈی ایس کارکنوں کے مسائل کے حل اور ان کے حقوق کے تحفظ کے لیے ہمیشہ پیش پیش رہیں۔ انہوں نے اپنی زندگی کے آخری لمحے تک آنگن واڑی ورکروں اور ہیلپروں کے جائز مطالبات کے حق میں پرامن جدوجہد اور مختلف احتجاجی تحریکوں میں بھرپور کردار ادا کیا۔وفد نے سوگوار خاندان سے دلی ہمدردی اور تعزیت کا اظہار کرتے ہوئے مرحومہ کی مغفرت، جنت الفردوس میں اعلیٰ مقام اور اہلِ خانہ کے لیے صبرِ جمیل کی دعا کی۔یونین نے اس عزم کا بھی اعادہ کیا کہ آنگن واڑی ورکروں اور ہیلپروں کے حقوق، وقار اور فلاح کے لیے پرامن جدوجہد پوری قوت کے ساتھ جاری رکھی جائے گی اور مرحومہ تسلیمہ سبحان کی خدمات ہمیشہ کارکنوں کی تحریک کے لیے مشعلِ راہ رہیں گی۔
