،لیفٹیننٹ گورنر کا ڈل کے کنارے ریڈنگ میراتھن کا افتتاح، منشیات سے انکار، کتابوں سے پیار۔ سنہا

نگران نیوز
سری نگر// لیفٹیننٹ گورنر منوج سنہا نے نوجوانوں پر زور دیا ہے کہ وہ منشیات سے مکمل طور پر دور رہتے ہوئے مطالعہ، جسمانی سرگرمیوں اور ماحول کے تحفظ کو اپنی زندگی کا حصہ بنائیں، کیونکہ یہی اقدار ایک صحت مند، باصلاحیت اور ذمہ دار معاشرے کی تشکیل کی بنیاد ہیں۔ انہوں نے کہا کہ نوجوانوں کو علم، نظم و ضبط اور قومی خدمت کے جذبے سے آراستہ کرنا وقت کی سب سے بڑی ضرورت ہے۔لیفٹیننٹ گورنر نے ہفتہ کے روز ڈل جھیل کے کنارے پانچ کلومیٹر طویل ریڈنگ میراتھن کو جھنڈی دکھا کر روانہ کیا۔ یہ پروگرام نیشنل بک ٹرسٹ کی جانب سے ایجوکیشن ویک کے تحت اور قومی تعلیمی پالیسی (این ای پی) کے کامیاب چھ برس مکمل ہونے کے موقع پر منعقد کیا گیا، جس میں جموں و کشمیر کی مختلف یونیورسٹیوں اور کالجوں کے ہزاروں طلبہ، اساتذہ، ماہرین تعلیم اور ادبی شخصیات نے شرکت کی۔ اس موقع پر منوج سنہا نے کہا کہ ریڈنگ میراتھن صرف ایک دوڑ نہیں بلکہ علم، جسمانی صحت اور ماحولیاتی ذمہ داری کو فروغ دینے کی ایک منفرد مہم ہے۔ انہوں نے کہا کہ قومی تعلیمی پالیسی کا مقصد تعلیم کو صرف کتابوں اور امتحانی کمروں تک محدود رکھنا نہیں بلکہ اسے عملی زندگی، کھیلوں، سماجی سرگرمیوں اور قومی ذمہ داری سے جوڑنا ہے۔انہوں نے کہا کہ چنار بک فیسٹیول کا پیغام "رن فار اے گرین فیوچر” اور نعرہ "سی نو ٹو ڈرگز، یس ٹو بکس” نوجوان نسل کو مثبت سوچ، صحت مند طرزِ زندگی اور تعمیری سرگرمیوں کی جانب راغب کرنے کی مؤثر کوشش ہے۔ ان کے مطابق مطالعہ انسان کی سوچ کو وسعت دیتا ہے، جسمانی ورزش قوت اور نظم و ضبط پیدا کرتی ہے جبکہ ماحول کا تحفظ آنے والی نسلوں کے محفوظ مستقبل کی ضمانت ہے۔لیفٹیننٹ گورنر نے کہا کہ صرف کتابیں پڑھ لینا کافی نہیں بلکہ ان سے حاصل ہونے والے علم کو عملی زندگی میں نافذ کرنا ہی حقیقی تعلیم ہے۔ انہوں نے کہا کہ موسمیاتی تبدیلی، ماحولیات یا صحت پر کتابیں پڑھنے سے زیادہ اہم یہ ہے کہ انسان خود ماحول کے تحفظ، جسمانی صحت اور سماجی خدمت کے لیے عملی اقدامات کرے۔ ان کے مطابق آج ریڈنگ میراتھن میں شریک نوجوانوں نے مثبت تبدیلی کے اسی سفر کا آغاز کیا ہے۔منوج سنہا نے نوجوانوں سے تین اہم عہد کرنے کی اپیل کرتے ہوئے کہا کہ وہ روزانہ مطالعے کی عادت اپنائیں، اپنی روزمرہ زندگی میں ماحول دوست رویے اختیار کریں اور معاشرے کی بہتری کے لیے مسلسل کردار ادا کریں۔ انہوں نے کہا کہ ایسے اقدامات ہی باشعور، ذمہ دار اور باکردار شہریوں کی تعمیر میں مددگار ثابت ہوں گے۔لیفٹیننٹ گورنر نے نیشنل بک ٹرسٹ کے ڈائریکٹر یوراج ملک، چنار بک فیسٹیول کی ٹیم کی کاوشوں کو بھی سراہا ۔