نگران نیوز
سری نگر//جموں و کشمیر میں عصمت دری اور بچوں کے جنسی استحصال (پوکسو) سے متعلق مقدمات کی تیز رفتار سماعت کیلئے اس وقت صرف چار فاسٹ ٹریک اسپیشل عدالتیں فعال ہیں، جن میں دو عدالتیں خصوصی طور پر پوکسو ایکٹ کے تحت درج مقدمات کی سماعت کرتی ہیں۔ لوک سبھا میں ایک سوال کے تحریری جواب میں قانون و انصاف کے مرکزی وزیر مملکت (آزادانہ چارج) ارجن رام میگھوال نے بتایا کہ 30 اپریل 2026 تک ملک کی 29 ریاستوں اور مرکز کے زیر انتظام علاقوں میں مجموعی طور پر 775 فاسٹ ٹریک اسپیشل عدالتیں کام کر رہی ہیں، جن میں 398 خصوصی پوکسو عدالتیں شامل ہیں۔ انہوں نے کہا کہ اکتوبر 2019 میں شروع کی گئی یہ مرکزی معاونت یافتہ اسکیم، جس کا مقصد عصمت دری اور پوکسو مقدمات کا جلد از جلد فیصلہ کرنا ہے، فی الحال 30 ستمبر 2026 تک توسیع دی گئی ہے۔ جموں و کشمیر میں چار فعال فاسٹ ٹریک اسپیشل عدالتیں موجود ہیں، جن میں سے دو صرف پوکسو مقدمات کی سماعت کیلئے مختص ہیں۔مرکزی حکومت نے مزید بتایا کہ فاسٹ ٹریک اسپیشل عدالتوں کی اسکیم کے تحت 2023-24میں جموں و کشمیر کو 2.32 کروڑ روپے، 2024-25میں 1.48 کروڑ روپے اور 2025-26میں 1.74 کروڑ روپے جاری کئے گئے۔ اس طرح گزشتہ تین برسوں کے دوران مرکز کی جانب سے مجموعی طور پر 5.54 کروڑ روپے کی مالی معاونت فراہم کی گئی۔حکومت کے مطابق زیر التوا مقدمات کی تعداد میں مسلسل اضافہ دیکھنے میں آیا، جو 2023 کے اختتام پر 2,02,175 سے بڑھ کر 2025 کے اختتام تک 2,45,579 تک پہنچ گئی۔
