نگران نیوز
سری نگر//جموں و کشمیر میں شدید بارشوں اور خراب موسم کی وجہ سے چھ دنوں تک معطل رہنے والی سالانہ امرناتھ یاترا کو ہفتے کے روز جموں کے بھگوتی نگر بیس کیمپ سے دوبارہ بحال کر دیا گیا ۔ حکام کے مطابق، 19 جولائی کو دونوں رو ٹس روایتی پہلگام اور بالتل روٹس پر احتیاطی تدابیر کے طور پر یاترا کو روکا گیا تھا۔ موسم میں بہتری آتے ہی انتظامیہ نے یاتریوں کے نئے قافلے کو روانہ کر دیا ۔ 6,269 یاتریوں پر مشتمل 18واں قافلہ 223 گاڑیوں کے قافلے میں بالہ تل بیس کیمپ کے لیے روانہ کیا گیا۔انتظامیہ نے واضح کیا ہے کہ فی الحال تمام گاڑیوں کو صرف بالتل روٹ کے لیے بھیجا گیا ہے اور پہلگام روٹ کے لیے فی الحال کوئی قافلہ روانہ نہیں ہوا۔ 57 دنوں تک جاری رہنے والی یہ سالانہ یاترا 28 اگست کو رکشا بندھن کے موقع پر اختتام پذیر ہوگی۔
