نگران نیوز
سری نگر//مرکزی وزارت برائے خواتین و اطفال کی ترقی نے لوک سبھا کو بتایا ہے کہ جموں و کشمیر میں آنگن واڑی کارکنوں کو ماہانہ صرف 600 روپے جبکہ آنگن واڑی معاونین کو 300 روپے اضافی اعزازیہ (ٹاپ اپ) دیا جاتا ہے، جو ملک کی ریاستوں اور مرکز کے زیر انتظام علاقوں میں سب سے کم اضافی مالی مراعات میں شمار ہوتا ہے۔وزارت کی جانب سے پیش کردہ اعداد و شمار کے مطابق مرکزی حکومت آنگن واڑی کارکنوں کو ماہانہ 4,500 روپے جبکہ معاون کارکنوں کو 2,250 روپے اعزازیہ فراہم کرتی ہے۔ اس کے علاوہ کارکردگی کی بنیاد پر آنگن واڑی کارکنوں کو 500 روپے اور معاونین کو 250 روپے ماہانہ ترغیبی رقم بھی دی جاتی ہے۔یو این ایس کے مطابق جموں و کشمیر حکومت کی جانب سے فراہم کیے جانے والے اضافی 600 روپے شامل کرنے کے بعد ایک آنگن واڑی کارکن کو کارکردگی پر مبنی ترغیبی رقم کے علاوہ مجموعی طور پر 5,600 روپے ماہانہ جبکہ ایک آنگن واڑی معاون کو 2,550 روپے ماہانہ ملتے ہیں۔مرکزی وزارت کے مطابق آنگن واڑی کارکنوں کے لیے جموں و کشمیر کا 600 روپے کا اضافی اعزازیہ ان ریاستوں اور مرکز کے زیر انتظام علاقوں میں دوسرا سب سے کم ہے جہاں اضافی رقم دی جاتی ہے۔
