نگرا ن نیوز
سری نگر// جموں و کشمیر بھر میں یکم ستمبر سے بجلی فیس کی نئی شرحیں نافذ ہوگئی ہیں۔سبھی قسم کے صارفین منگل سے نظرثانی شدہ ٹیرف ادا کریں گے، جس میں جوائنٹ الیکٹرسٹی ریگولیٹری کمیشن برائے جموں و کشمیر اور لداخ کی طرف سے منظور شدہ اوسط 6.83 فیصد اضافہ یکم ستمبر سے نافذ ہو رہا ہے۔نظرثانی شدہ ٹیرف یکم ستمبر 2026 سے 31 مارچ 2027 کے درمیان استعمال ہونے والی بجلی پر لاگو ہو گا، جو 2026-27 کے مالی سال کے بقیہ حصے کا احاطہ کرتا ہے۔میٹر والے گھریلو صارفین کے لیے 200 یونٹ تک ماہانہ استعمال کے لیے انرجی چارج 2.45 روپے فی یونٹ، 201 سے 400 یونٹ کے درمیان استعمال کے لیے 4.20 روپے فی یونٹ اور 400 یونٹ سے زائد استعمال کے لیے 4.60 روپے فی یونٹ مقرر کیا گیا ہے۔ پہلے زمرے میں 10فیصد، دوسرے زمرے میں 15فیصد اور تیسرے زمرے کے صارفین کے فیص میں 25 فیصد کا اضافہ کیا گیا ہے۔ہر ایک صارف پر اوسطاًمہینے میں 250روپے کا اضافی بجلی فیس ادا کرنا پڑیگا۔فکسڈ چارج کو 10 روپے فی کلو واٹ ماہانہ کر دیا گیا ہے۔نئی ٹیرف رجیم میں 10 کلو واٹ سے زیادہ کے منظور شدہ لوڈ والے صارفین کے لیے ٹائم آف ڈے (ٹی او ڈی)بلنگ بھی متعارف کرائی گئی ہے۔سوائے زرعی زمرے کے صارفین کے، سسٹم کے تحت، بجلی کے چارجز اس مدت کے لحاظ سے مختلف ہوں گے، جس کے دوران بجلی استعمال ہوتی ہے۔ ریگو لیٹری اتھارٹی جموں پاور ڈسٹری بیوشن کارپوریشن لمیٹڈاور کشمیر پاور ڈسٹری بیوشن کارپوریشن لمیٹڈکی آمدنی کی ضروریات کے جائزے کے بعدنظرثانی کرتی ہے۔کمیشن نے موجودہ ٹیرف کے تحت 7,352.87 کروڑ روپے کی متوقع آمدنی کے مقابلے میں دونوں تقسیم کار کمپنیوں کی مشترکہ سالانہ آمدنی کی ضرورت کا تخمینہ 10,275.72 کروڑ روپے لگایا، جس کے نتیجے میں 2,922.85 کروڑ روپے کا فرق ہے۔کمیشن کے مطابق صارفین کے ٹیرف کے ذریعے پورے شارٹ فال کو پورا کرنے کے لیے تقریبا ً40 فیصد اضافہ درکار ہوتا۔ تاہم، حکومت کی طرف سے 2,420.78 کروڑ روپے کی مالی امداد نے اوسط ٹیرف میں اضافے کو 6.83 فیصد تک محدود کرنے میں مدد کی۔ٹیرف میں اضافے نے سیاسی تنقید کی ہے اور جموں و کشمیر کے کچھ حصوں میں احتجاج کو جنم دیا ہے، اپوزیشن جماعتوں اور گروپوں نے صارفین پر اضافی مالی بوجھ اور 200 یونٹ مفت بجلی کے حوالے سے حکومت کے پہلے وعدے پر تشویش کا اظہار کیا ہے۔اب نظرثانی شدہ ٹیرف کے نفاذ کے ساتھ، بجلی کے بل یکم ستمبر سے ریکارڈ کی گئی کھپت کے لیے نئی شرحوں کے مطابق ہوگا۔
