نگر ان نیوز
سری نگر/ / جموں میں نارکوٹکس کنٹرول بیورو (این سی بی) کی حراست سے ایک مبینہ منشیات اسمگلر فرار ہوگیا، جس کے بعد سکیورٹی ایجنسیوں نے خطے میں تلاشی اور ناکہ بندی کا سلسلہ تیز کردیا ہے۔میڈیا رپورٹس کے مطابق فرار ہونے والے ملزم کی شناخت عاقب بشیر ساکن کاکاپورہ، ضلع پلوامہ کے طور پر ہوئی ہے۔ اسے این سی بی نے 3 ستمبر کو گرفتار کیا تھا۔ حکام کے مطابق ملزم کے قبضے سے سانبہ ضلع میں ایک مسافر بس کے دوران 522 گرام ہیروئن برآمد کی گئی تھی۔رپورٹس کے مطابق عاقب بشیر اتوار اور پیر کی درمیانی شب جموں کے نروال علاقے میں این سی بی کی حراست سے فرار ہونے میں کامیاب ہوگیا۔ واقعے کے بعد پولیس اور دیگر سکیورٹی ایجنسیوں نے اہم داخلی اور خارجی راستوں پر تلاشی، گاڑیوں کی چیکنگ اور مسافروں کی جامہ تلاشی کا عمل تیز کردیا ہے تاکہ فرار ملزم کو جموں و کشمیر سے باہر جانے سے روکا جاسکے۔ملزم کی گرفتاری کے لیے مختلف مقامات پر تلاشی ٹیمیں تعینات کی گئی ہیں، جبکہ حکام اس بات کی بھی تحقیقات کررہے ہیں کہ این سی بی کی حراست سے ملزم کس طرح فرار ہونے میں کامیاب ہوا۔رپورٹس کے مطابق عاقب بشیر کی گرفتاری جموں ڈویڑن میں این سی بی کی جانب سے جاری ایک ماہ طویل کارروائی کے دوران عمل میں آئی تھی۔ اس کارروائی کے دوران منشیات اسمگلروں کی جانب سے جموں و کشمیر میں ہیروئن پہنچانے کے لیے استعمال کیے جانے والے دو راستوں کا بھی پتہ لگانے کا دعویٰ کیا گیا ہے۔رپورٹس میں بتایا گیا ہے کہ ان میں ایک راستہ پاکستان سے اوڑی سیکٹر کے راستے براہ راست اسمگلنگ سے متعلق ہے، جبکہ دوسرا راستہ پنجاب کے ذریعے بالواسطہ طور پر منشیات جموں و کشمیر پہنچانے کے لیے استعمال کیا جاتا ہے۔حکام نے فرار ملزم کی گرفتاری کے لیے سرچ آپریشن مزید وسیع کردیا ہے اور معاملے کی تحقیقات جاری ہیں۔
