نگران نیوز
سری نگر/ / جموں و کشمیر قانون ساز اسمبلی کے اسپیکر عبدالرحیم راتھر نے منگل کے روز سینئر افسران کے ساتھ ایک اعلیٰ سطحی اجلاس منعقد کرکے اسمبلی کے آئندہ خزاں اجلاس کی تیاریوں کا جائزہ لیا اور متعلقہ محکموں کو اجلاس کے کامیاب اور ہموار انعقاد کے لیے پیشگی منصوبہ بندی اور باہمی تال میل یقینی بنانے کی ہدایت دی۔ اسمبلی کا خزاں اجلاس 21 ستمبر 2026 سے سری نگر میں شروع ہوگا۔اجلاس میں اسمبلی کے سیکریٹری منوج کمار پنڈت، کمشنر سیکریٹری انفارمیشن ٹیکنالوجی سوربھ بھگت، کمشنر سیکریٹری جنرل ایڈمنسٹریشن ایم راجو، کمشنر سیکریٹری قانون، انصاف و پارلیمانی امور اچل سیٹھی، ڈویڑنل کمشنر کشمیر انشل گرگ کے علاوہ سکیورٹی، ٹریفک، اطلاعات، مہمان نوازی و پروٹوکول، اسٹیٹس، صحت، آیوش، سری نگر میونسپل کارپوریشن، فائر اینڈ ایمرجنسی سروسز اور دیگر متعلقہ محکموں کے سینئر افسران موجود تھے۔اسپیکر نے کہا کہ قانون ساز اسمبلی کے اجلاس کا کامیاب انعقاد تمام متعلقہ محکموں کے درمیان قریبی تال میل، پیشگی منصوبہ بندی اور انتظامی سطح پر مکمل تیاری کا تقاضا کرتا ہے۔ انہوں نے کہا کہ آئندہ خزاں اجلاس اگرچہ مختصر ہوگا تاہم اس کی ذمہ داری اہم ہے، اس لیے انتظامات کے کسی بھی پہلو کو معمولی نہیں سمجھا جانا چاہیے۔انہوں نے افسران کو خبردار کیا کہ بروقت حل نہ کیے جانے والے چھوٹے مسائل بعد میں بڑے مسائل پیدا کرسکتے ہیں۔ اسپیکر نے اجلاس کے دوران مختلف انتظامات پر تفصیلی غور کیا اور متعلقہ محکموں کو ضروری ہدایات جاری کیں۔اجلاس میں سکیورٹی انتظامات پر خصوصی توجہ دی گئی۔ اسپیکر نے متعلقہ حکام کو اسمبلی سیکریٹریٹ اور ایم ایل اے ہاسٹل میں جامع اور فول پروف سکیورٹی انتظامات یقینی بنانے کی ہدایت دی۔ انہوں نے سکیورٹی اور انتظامی اداروں کے درمیان مؤثر تال میل پر بھی زور دیا۔قانون سازی سے متعلق امور پر اسپیکر نے محکمہ جنرل ایڈمنسٹریشن کو ہدایت دی کہ تمام متعلقہ محکمے اسمبلی میں پوچھے جانے والے سوالات کے جوابات مقررہ مدت کے اندر فراہم کریں۔ انہوں نے محکموں کو نوڈل افسران مقرر کرنے کی ہدایت بھی دی تاکہ اسمبلی سیکریٹریٹ کے ساتھ رابطہ مؤثر بنایا جاسکے اور اجلاس سے متعلق معاملات کو بروقت نمٹایا جائے۔انہوں نے سرکاری بلوں کو اسمبلی سیکریٹریٹ میں پیشگی جمع کرانے کی ہدایت دی تاکہ ان کی بروقت کارروائی اور اجلاس کے دوران مناسب شیڈولنگ ممکن ہوسکے۔اجلاس میں قومی ای ودھان ایپلی کیشن کے ہائبرڈ ماڈل پر عمل درآمد سے متعلق پیش رفت سے بھی آگاہ کیا گیا۔ اسپیکر نے محکمہ اطلاعاتی ٹیکنالوجی کو اجلاس کے دوران قابل اعتماد وائی فائی، انٹرنیٹ کنکٹیویٹی اور ضروری تکنیکی سہولیات یقینی بنانے کی ہدایت دی۔ٹریفک کے حوالے سے اسپیکر نے اسمبلی احاطے اور دیگر متعلقہ مقامات کے اطراف مؤثر ٹریفک انتظامات پر زور دیا تاکہ اجلاس کے دوران عام لوگوں کی آمدورفت متاثر نہ ہو۔ ارکان اسمبلی کے لیے مناسب ٹرانسپورٹ اور پارکنگ سہولیات فراہم کرنے کی بھی ہدایت دی گئی۔اسپیکر نے محکمہ جل شکتی اور محکمہ بجلی کو اجلاس کے دوران پانی اور بجلی کی بلاتعطل فراہمی یقینی بنانے کی ہدایت دی۔ سری نگر میونسپل کارپوریشن کو اسمبلی احاطے اور ایم ایل اے ہاسٹل کے اطراف صفائی ستھرائی اور حفظانِ صحت کے مناسب انتظامات کرنے کی ہدایت دی گئی۔محکمہ صحت اور آیوش کو اسمبلی احاطے میں ارکان اسمبلی، عملے اور اجلاس میں آنے والے افراد کی سہولت کے لیے ضروری طبی سہولیات اور آیوش مراکز قائم کرنے کی ہدایت دی گئی۔محکمہ اطلاعات کو اسمبلی کی کارروائی کی جامع میڈیا کوریج کے لیے مناسب انتظامات کرنے اور صحافیوں سے متعلق امور میں مؤثر رابطہ و نظم و نسق یقینی بنانے کی ہدایت دی گئی۔اسپیکر عبدالرحیم راتھر نے تمام متعلقہ محکموں اور افسران پر زور دیا کہ وہ اسمبلی سیکریٹریٹ کے ساتھ مسلسل رابطے میں رہیں، مقررہ وقت کی سختی سے پابندی کریں اور اجلاس شروع ہونے سے قبل تمام ضروری انتظامات مکمل کرلیں۔انہوں نے کہا کہ حکومت اور متعلقہ اداروں کا بنیادی مقصد اسمبلی اجلاس کو پْرامن، منظم، نتیجہ خیز اور باوقار انداز میں منعقد کرنا ہے تاکہ قانون ساز ادارے کی ذمہ داریوں کو مؤثر طریقے سے نبھایا جاسکے اور جموں و کشمیر کے عوام کی توقعات پوری ہوں۔
