نگران نیوز
سری نگر//وزیراعلیٰ عمرعبداللہ کی جانب سے جمعہ25ستمبرکو جموں وکشمیرکی ریاستی حیثیت کی بحالی سے متعلق قرار داد اسمبلی میں پیش کئے جانے اوراس دوران قرار دادمیں 2000کی خودمختاری قرار دادکاحوالہ دئیے جانے پر بھاجپاارکان کے شدیداعتراض کے ایک روز بعد26ستمبربروز ہفتہ کوجموں و کشمیر قانون ساز اسمبلی میں قائد حزبِ اختلاف سنیل کمار شرما نے نئی دہلی میں مرکزی وزیر داخلہ امت شاہ سے ملاقات کی اور مختلف امور پر تبادلہ خیال کیا۔یہ سنیل شرما کی وزیر داخلہ امت شاہ سے5روز میں دوسری ملاقات تھی ۔جموں و کشمیر میں اپوزیشن لیڈر سنیل شرما نے اپنے ایکس ہینڈل پر بتایا کہ انہوں نے26 ستمبر2026 کو نئی دہلی میں مرکزی وزیر داخلہ امت شاہ سے ثانی الذکرکی رہائش گاہ پر ملاقات کی اور علاقے سے متعلق اہم امور پر تبادلہ خیال کیا۔بتایاجاتاہے کہ میٹنگ میں جموں و کشمیر میں سیکورٹی کی موجودہ صورتحال، انسدادِ دہشت گردی کے اقدامات اور امن و امان کی مجموعی صورتحال کا جائزہ لیا گیا۔ جموں و کشمیر قانون ساز اسمبلی کے جاری اجلاس اور مقامی طرزِ حکمرانی سے متعلق امور پر بات چیت کی گئی۔ علاقائی ترقیاتی اقدامات، دور دراز علاقوں تک سڑکوں کی رسائی اور سیاحت و صنعت جیسے معاشی شعبوں کو فروغ دینے پر گفتگو کی گئی۔بتایاجاتاہے کہ سنیل شرما نے اسپیشل پولیس آفیسرز کی تنخواہوں میں اضافے کے زیر التوا معاملے کو اٹھایا تاکہ اس کا جلد حل نکالا جا سکے۔ سنیل شرما کے مطابق، امت شاہ نے خطے میں امن، ترقی اور خوشحالی کے لیے مرکزی حکومت کے عزم کا اعادہ کیا۔یہ سنیل شرما کی وزیر داخلہ امت شاہ سے5روز میں دوسری ملاقات تھی۔ بتایا جاتاہے کہ سنیل کمار نے بی جے پی کے قومی صدر نتن نابین سے بھی ملاقات کی۔قابل ذکر ہے کہ سنیل کمار شرما نے22 ستمبر کو اسمبلی کی کارروائی میں شرکت نہیں کی تھی اور نئی دہلی روانہ ہوگئے تھے۔ جمعہ کو بھی وہ ایوان کی کارروائی مکمل ہونے سے قبل اسمبلی سے روانہ ہوکر قومی دارالحکومت گئے۔
