نگران نیوز
کپوارہ//شمالی کشمیر کے کپوارہ ضلع کے سرحدی علاقے کرناہ میںں پیر کو ایک انتہائی دلدوز سڑک حادثہ میں 5 افراد کی موت واقع ہو گئی۔ کپوارہ ضلع کے سرحدی علاقہ کرناہ کے سَیماری گائوں میں ایک سکار پیو گاڑی گہری کھائی میں جا گری جس کے نتیجے میں کم از کم5 افراد ہلاک جبکہ کئی دیگر زخمی ہوگئے۔حکام کے مطابق حادثہ کے فوراً بعد پولیس اور سول انتظامیہ نے ریسکیو آپریشن شروع کیا۔ زخمیوں کو ابتدائی طور پر ٹنگڈار کے سب ڈسٹرکٹ اسپتال منتقل کیا گیا، جہاں انہیں طبی امداد فراہم کی گئی۔ بعد میں مزید علاج کیلئے انہیں جی ایم سی ہندوارہ منتقل کیا گیا۔ ہلاک ہونے والوں میں 32 سالہ محمد ادریس، انکی اہلیہ سیدہ بیگم اور ان کی حمزہ نامی9ماہ کی بیٹی بھی شامل ہے۔پولیس نے واقعے کا نوٹس لے لیا ہے اور حادثے کی وجوہات اور دیگر تفصیلات جمع کی جا رہی ہیں۔دریں اثنا، لیفٹیننٹ گورنر منوج سنہا نے حادثے میں قیمتی جانوں کے ضیاع پر گہرے دکھ کا اظہار کیا۔ سماجی رابطہ گاہ ایکس پر انہوں نے لکھا قیمتی جانوں کے ضیاع سے انتہائی رنجیدہ ہوں، سوگوار خاندانوں سے دلی تعزیت اور زخمیوں کی جلد صحت یابی کے لیے دعاگو ہوں۔وزیراعلیٰ عمر عبداللہ نے المناک سڑک حادثے پر گہرے دکھ کا اظہار کیا۔ وزیر اعلیٰ کے دفتر کے آفیشل ایکس ہینڈل کے مطابق سوگوار خاندانوں سے دلی تعزیت کا اظہار کرتے ہوئے وزیراعلیٰ نے انتظامیہ اور طبی عملہ کو ہدایت دی ہے کہ سبھی زخمیوں کو بہترین ممکنہ طبی سہولیات فراہم کی جائیں۔
