نگران نیوز
سری نگر//جموں و کشمیر حکومت نے مرکز کے زیر انتظام خطے کے دور دراز اور کم مواصلاتی سہولیات والے علاقوں میں موبائل رابطے کو وسعت دینے کیلئے 12 مقامات پر موبائل ٹاورز کی تنصیب کی خاطر اراضی فراہم کرنے کی منظوری دے دی ۔جے کے این ایس کے مطابق وزیر اعلیٰ عمر عبداللہ نے منگل کے روز کہا کہ جموں و کشمیر حکومت نے یونین ٹیریٹری کے ان علاقوں میں، جہاں مواصلاتی سہولیات ناکافی ہیں، موبائل ٹاورز کی تنصیب کے لیے زمین فراہم کرنے کی منظوری دے دی ہے۔وزیر اعلیٰ عمر عبداللہ نے سوشل میڈیا پلیٹ فارم ’ایکس‘ پر ایک پوسٹ میں بتایا کہ یونیورسل سروس آبلیگیشن فنڈ (USOF) کے تحت موبائل ٹاورز کی تنصیب کے لیے اُوڑی، ٹنگمرگ، کرناہ، کالاکوٹ، کرالپورہ، بسنت گڑھ، کھور، لٹی مروتی، بانہال، پوگل پریستان، رامسو اور قلعہ درہال میں اراضی کی منظوری دی گئی ہے۔وزیر اعلیٰ کے مطابق اس اقدام کا مقصد جموں و کشمیر کے مختلف علاقوں میں تیز رفتار ٹیلی کام خدمات کی رسائی کو وسعت دینا ہے۔انہوں نے کہا کہ اس سے دور دراز اور سرحدی دیہات میں مواصلاتی رابطہ مزید مضبوط ہوگا، جبکہ آن لائن تعلیم، ای-گورننس خدمات اور ہنگامی حالات میں مواصلاتی سہولیات تک رسائی بہتر بنانے میں بھی مدد ملے گی۔حکومت کے مطابق موبائل نیٹ ورک کی توسیع سے ان علاقوں میں ڈیجیٹل خلا کو کم کرنے میں بھی مدد ملے گی۔
