نگران نیوز
سری نگر// ڈائریکٹر اسکول ایجوکیشن کشمیر نصیر احمد وانی نے کہا ہے کہ موجودہ شیڈول میں ترمیم کا کوئی فوری منصوبہ نہیں ہے۔جے کے این ایس کے مطابق میڈیا سے بات کرتے ہوئے، ڈائریکٹر نے کہا کہ اسکول کے موجودہ اوقات تعلیمی کیلنڈر اور موسمی حالات کو مدنظر رکھتے ہوئے مقرر کیے گئے تھے، اور طلبہ و عملے کو بدلتے ہوئے موسم کے مطابق خود کو ڈھالنا ہوگا۔انہوں نے کہاکہ یہ سچ ہے کہ والدین کی جانب سے یہ مطالبہ کیا جا رہا ہے کہ اس ماہ اوقات تبدیل کیے جائیں کیونکہ صبح کے وقت بہت سردی ہوتی ہے۔انہوںنے کہاکہ مطالبہ درست ہے، لیکن ہمارا کیلنڈر ان چیزوں کیلئے تیار ہونا چاہیے۔ وانی نے کہا کہ محکمہ اس سال اوقات کو صبح9 بجے پر منتقل کر چکا ہے، جبکہ اس سے قبل گرمیوں کے دوران اسکول کے اوقات میں کئی بار تبدیلی کی جاتی تھی۔انہوںنے مزیدکہاکہ اس سے پہلے، گرمیوں میں ہم اوقات کو دو تین بار تبدیل کرتے تھے اور آخر کار ہمارے اوقات صبح ساڑھے 8 بجے ہو جاتے تھے۔ لیکن اس بار، ہم نے اوقات صبح 9 بجے مقرر کیے ہیں۔ڈائریکٹر نے کہا کہ اسکول کے موجودہ اوقات تمام والدین اور طلبہ کے لئے بھی مناسب ہیں۔ وانی نے یہ بھی کہا کہ اسکول کے اوقات میں نظرثانی کا تعلق سالانہ در بار موو کے شیڈول سے ہے، جس سے اشارہ ملتا ہے کہ محکمہ نومبر میں اوقات تبدیل کرے گا۔
