ارنیاجموں میں سرحد پار منشیات نیٹ ورک بے نقاب، پستول، ہیروئن اور افیون برآمد،2افراد گرفتار

نگران نیوز
سری نگر//حکام نے بتایا کہ جموں ضلع کے ارنیا علاقے میں ڈرون کے ذریعے سامان(منشیات واسلحہ) گرانے کے مبینہ معاملے کے سلسلے میں2افراد کو گرفتار کیا گیا ہے۔پولیس کے ایک اعلیٰ عہدیدار نے بتایا کہ ان دونوں افراد کو ارنیا میں ڈرون کے ذریعے سامان گرانے کے مبینہ معاملے میں گرفتار کیا گیا۔عہدیدار نے کہا کہ پوچھ گچھ کے دوران ملزمان نے انکشاف کیا کہ انہیں ڈرون کے ذریعے سامان کی2کھیپیں موصول ہوئی تھیں۔ تفتیش کے دوران ان کے قبضے سے اٹلی ساختہ بریٹا پستول، 2میگزین، 4 زندہ کارتوس اور منشیات برآمد کی گئیں۔یہ گرفتاریاں پیر اور منگل کی درمیانی شب عمل میں لائی گئیں۔ ملزمان کی شناخت راہول کمار ولد ریشپال چند، ساکن ٹریوا اور اجے کمار ولد منگل داس، ساکن تلاہار کے طور پر کی گئی ہے۔پولیس نے بتایا کہ تفتیش کے نتیجے میں اٹلی ساختہ ایک بریٹا پستول، 2 میگزین، 4 زندہ کارتوس، تقریباً 500 گرام ہیروئن اور 500 گرام افیون برآمد ہوئی۔ پولیس کے مطابق، ملزمان نے یہ بھی انکشاف کیا کہ انہیں ڈرون کے ذریعے سامان کی دو کھیپیں موصول ہوئی تھیں اور ان کے پاکستان میں موجود ہینڈلرز (سہولت کاروں) کے ساتھ روابط تھے۔حکام نے بتایاکہ اس سلسلے میں پولیس اسٹیشن ارنیا میں این ڈی پی ایس ایکٹ کی دفعات 8، 21، 22 اور 29 اور آرمز ایکٹ کی دفعہ 3/25 کے تحت ایف آئی آر نمبر 64/2026 درج کی گئی ہے۔ اس معاملے کی مزید تفتیش جاری ہے۔