سرینگر:صدرِ نیشنل کانفرنس ڈاکٹر فاروق عبداللہ (رکن پارلیمان وسطی کشمیر) نے حال ہی میں پایہ تکمیل کو پہنچی زیڈ مور ٹنل (گگن گیر سے سونہ مرگ ) کا سفر کیا اور مکمل ہوئی ٹنل کا جائزہ لینے کے علاوہ تعمیراتی ایجنسی، انجینئر وں اور مزدوروں کو خراج تحسین پیش کیا۔ اُن کے ہمراہ پارٹی کے صوبائی صدر ناصر اسلم وانی، سینئر لیڈر و سابق ایم ایل اے کنگن میاں الطاف احمد اور پارٹی لیڈر تنویر صادق بھی تھے۔ ڈاکٹر فاروق عبداللہ ملک کے پہلے سیاسی لیڈر ہیں جنہوں نے اس ٹنل کو پار کیا ہے۔ انہوں نے زوجیلا ٹنل کا بھی دورہ کیا اور وہاں جاری کام کا بھی جائزہ لیا۔ اس کے علاوہ انہوں نے مقامی لوگوں اور پارٹی سے وابستہ ورکروں کیساتھ بھی تبادلہ خیالات کیا اور اُن کے مسائل و مشکلات اور مطالبات کی جانکاری حاصل کی۔ دیگر مسائل و مشکلات اُجاگر کرنے کے علاوہ مقامی لوگوں نے مطالبہ کیا کہ تمام پروجیکٹوں کیلئے مقامی لوگوں کو روزگار ملنا چاہئے ۔ ڈاکٹر فاروق عبداللہ نے لوگوں کو یقین دہانی کرائی کہ وہ وزیر اعظم ہند اور وزیر برائے روڈ و ٹرانسپورٹ شری نتن گڈکری کیساتھ یہ معاملہ اُٹھائیں گے اور انہیں اس بات کیلئے قائل کریں گے کہ روزگار کے معاملے میں مقامی لوگوں کو ترجیح دی جائے اور وہ ساتھ ہی دوسری ٹنل کا بھی معاملہ اُٹھائیں گے۔ ڈاکٹر فاروق عبداللہ نے کہا کہ ’’میں بہت ہی اُن ٹنل کی تعمیر سے وابستہ ایجنسی اور ہر ایک شخص کا شکرگزار ہوں جنہوں نے دن رات کام کرکے اس ٹنل کی تعمیر کو یقینی بنایا۔‘‘ انہوں نے کہا کہ ’’انشاء اللہ زوجیلا ٹنل بھی جلد ہی مکمل ہوکر تیار ہوجائیگی اور لداخ کا راستہ آسان ہوجائے گا۔ میں مقامی لوگوں کے مطالبات کے عین مطابق وزیر اعظم ہند اور شری نتن گڈکری کو مکتوب روانہ کروں گا کہ ان پروجیکٹوں میں مقامی لوگوں کو نوکریاں فراہم ہونی چاہئیں اور ساتھ ہی اپنے اراکین پارلیمان سے بھی یہ معاملہ پارلیمنٹ میں اٹھانے کیلئے کہوں گا۔‘‘سونہ مرگ کو سرمائی کھیلوں کیلئے سازگار بنانے پر زور دیتے ہوئے ڈاکٹر فاروق عبداللہ نے کہا کہ بھارت نے ٹوکیوں اولمپکس میں 6میڈل جیتے لیکن ونٹر سپورٹس میں ہمارا ملک بہت پیچھے ہے ۔ ہم چاہتے ہیں کہ ان کھیلوں میں بھی ہمارے کھلاڑی اچھی کارکردگی دکھائیں، اس کے لئے ضروری ہے کہ ہم سونہ مرگ کو بھی ونٹر سپورٹس کیلئے تیار کریں۔