سرینگر:کشمیر سیاحوں کیلئے محفوظ ترین جگہ ہے اور یہاں کسی کو کوئی خطرہ نہیں، کشمیر پوری دنیا میں سیاحوں کیلئے محفوظ ترین جگہوں میں شمار ہوتا ہے اس لئے ملک اور بیرونِ ملک کے عوام کو بنا کسی خوف و ڈر کے کشمیر آنا چاہئے اور یہاں کی قدرتی خوبصورتی سے لطف اندوز ہونا چاہئے۔سی این آئی کے مطابق ان باتوں کا اظہار صدرِ نیشنل کانفرنس ڈاکٹر فاروق عبداللہ نے ایک کانفرنس کے دوران کیا ۔ خیال رہے کہ قومی سطح کا یہ دو روزہ اجلاس کل سونہ مرگ کے ہوٹل میں شروع ہوا اور ڈاکٹر فاروق عبداللہ نے اس میں مہمانِ خصوصی کے طور شرکت کی اور انڈسٹریز سیکٹر میں بہترین کارکردگی دکھانے والوں میں گرین ٹیک ڈائریکٹر ایوارڈ بھی تقسیم کئے۔ اس تقریب میں ملک بھر کی انڈسٹریز سے وابستہ 150ڈیلی گیٹوں نے شرکت کی جبکہ نیشنل کانفرنس کے سینئر لیڈر اور سابق ایم ایل اے کنگن میاں الطاف احمد بھی اس موقعے پر موجود تھے۔ڈاکٹر فاروق عبداللہ نے ڈائریکٹر ایوارڈ حاصل کرنے والوں کو مبارکباد پیش کی اور اس بات پر خوشی کا اظہار کیا کہ اس تقریب کا انعقاد کشمیر میں کیاگیا۔ انہوں نے کہا کہ کشمیر دریائوں، جنگلوں، پہاڑوں، سبزہ زاروں اور دیگر قدرتی حسن سے مالامال ہے اور دنیا میں ایسی کم جگہیں ہیں جہاں ہمیں یہ سب کچھ ایک ساتھ دیکھنے کو ملتا ہے۔انہوں نے کہا کہ ملک اور بیرونِ ملک کے عوام کو بنا کسی ہچکچاہٹ کے کشمیر آنا چاہئے اور یہاں کی قدرتی خوبصورتی سے لطف اندوز ہونا چاہئے۔ کشمیر ہمیشہ سیاحوں کیلئے محفوظ جگہ رہی ہے اور آج بھی ہے۔
