سرینگر:اپنی پارٹی صدر سید محمد الطاف بخاری نے جموں وکشمیر کی روایتی سیاسی جماعتوں کے مایوس کن رول پر افسوس کا اظہار کیا ہے جس وجہ سے انتظامی اداروں اور عوام کے درمیان رابطہ منقطع ہواہے۔ ضلع ڈوڈہ کے ٹھاٹھری علاقہ میں منعقدہ اپنی پارٹی کے یک روزہ کنونشن سے خطاب کرتے ہوئے بخاری نے کہاکہ پچھلے ستر سالوں سے جموں وکشمیر کی عوام خاص طور سے نوجوانوں کو دھوکہ دہی سیاست سے ٹھگا گیا جس کو اب ختم کرنے کی ضرورت ہے۔ انہوں نے کہا’’ انتہائی بدقسمتی کا مقام ہے کہ جموں وکشمیر کی سیاسی جماعتوں نے انتخابی مقاصد کی تکمیل کیلئے لوگوں کے جذبات کو اُکسایا اور اِس طرح کی سیاست نے خطہ کے سماجی۔ معاشی وسیاسی استحکام کو بُری طرح متاثر کیا‘‘۔ بخاری نے کہاکہ جموں وکشمیر کی سیاسی جماعتوں کی طرف سے کئے گئے سمجھوتوں کی قیمت نہ صرف لوگوں کو چکانی پڑی بلکہ اِس سے تشدد اور عدم تحفظ کو بھی شہ ملی۔اپنی پارٹی صدر نے کہا’’ایسی گندی سیاست سے نہ صرف قیمتی جانوں کا اتلاف ہوا بلکہ اِس سے بھاری معاشی نقصان بھی ہوا جو کہ جموں وکشمیر کی ترقی اور خوشحالی کے لئے نقصان دہ ثابت ہوا‘‘۔ صداقت پر مبنی سیاسی ماحول کو مضبوط کرنے کے لئے اپنی کوششیں جاری رکھنے کا عزم کا اعادہ کرتے ہوئے بخاری نے کہاکہ اپنی پارٹی جموں وکشمیر کے اندر ایک بااعتماد سیاسی آواز کے طور اُبھر کر سامنے آئی ہے جس نے شفافیت ، تقویت اور حقیقت پر مبنی سیاست کو قائم کیا ہے۔ڈوڈہ کی عوام سے اپنی پارٹی کو ایک موقع دینے اور زمینی سطح پر کی کارکردگی دیکھنے کی اپیل کرتے ہوئے بخاری نے کہا’’اپنی پارٹی نے عملی سیاسی نظریہ کو متعارف کر کے جموں وکشمیر کی تاریخ میں نئے سیاسی دور کی شروعات کی ہے۔ اِس نے لوگوں کے حقوق اور مفادات کے ساتھ صفر فیصد سمجھوتے کو یقینی بنانا ہے۔ اِس جماعت نے اپنے سیاسی موقف میں کوئی تبدیلی نہیں کی، اُن سیاسی چمیلین کی طرح جوکہ اپنے مفادات کو ملحوظ ِ نظر رکھ کر مختلف مقامات پر مختلف زبانیں بولتے ہیں‘‘۔ اس موقع پر پارٹی سنیئر نائب صدر غلام حسن میر نے کہاکہ ڈوڈہ خاص طور سے قصبہ ٹھاٹھری میں سیاحتی شعبہ کو ترقی دینے کے وسیع امکانات موجود ہیں۔ یہ سرزمین قدرتی وسائل سے مالامال ہے جن کو بروئے کار لانے سے خطہ کااقتصادی نقشہ ہی تبدیل ہوسکتا ہے۔ میر نے پارٹی کے ترقیاتی ایجنڈہ کو دوہراتے ہوئے کہا’’اپنی پارٹی نے جموں وکشمیر کے سبھی خطوں اور ذیلی علاقوں کی ہمہ جہت سماجی اقتصادی ترقی کا یقین دلایا ہے، جیساکہ ہمارے صد ر موصوف نے اعلان کیا ہے کہ اپنی پارٹی اگر اقتدار میں آتی ہے تو فی کنبہ ماہانہ 300یونٹ مفت بجلی فراہم کی جائے گی‘‘۔ کنونشن کے دوران سرکردہ سماجی وسیاسی کارکنان نے شمولیت اختیار کی، اِن میں جان محمد، منصور احمد، دین محمد، نور محمد، مہراج دین، محمد اکرم، صفر علی، ظفر اللہ، عبدالمجید پرے، غلام محمد ، احمد اللہ، طارق حسین، محمد اشرف، عنایت اللہ، اشفاق احمد، فاروق وانی، نصار احمد، نجار الدین، معاروف ، الطاف حسین، لیاقت علی، عبدالقیوم اور فقیر محمد قابل ِ ذکر ہیں۔ کنونشن میں صوبائی صدر جموں منجیت سنگھ، نائب صدر سید اصغر علی، ضلع صدر ڈوڈہ ڈاکٹر رحمت اللہ، سابقہ ایم ایل اے فقیر ناتھ، ریاستی ایس سی کارڈی نیٹر بودھ راج بھگت ، اپنی ٹریڈ یونین صدر اعجاز کاظمی، ریاستی یوتھ ونگ نائب صدر رقیق احمد خان، صوبائی سیکریٹری ڈاکٹر روہت، کارڈی نیٹر چناب ویلی ایڈووکیٹ عمر ملک، ضلع صدر کشتواڑ موہندر پریہار، صوبائی نائب صدر اپنی ٹریڈ یونین شیخ لطیف، ضلع کارڈی نیٹر اور پروگرام کے منتظم اصغر علی کھانڈے، یوتھ ونگ ضلع صدر ڈوڈہ شیخ بشارت، بنسی لال کے علاوہ سجاد احمد وانی، طیعب بیگ، سہیل ملک، محمد شمیم ، سردار سرجیت سنگھ، وریندر سنگھ، مشتاق احمد، محمد رفیع، جاوید اقبال، غلام حیدر، غلام حسین، محمد اشرف، نظر صاحب وغیرہ نے بھی شرکت کی۔
