نئی دہلی: 23 ستمبر:وزیراعظم نریندرمودی پیرکے روز ملک کے باشندوں کو ان کی صحت کے لیے ایک بڑا تحفہ دینے جا رہے ہیں مرکزی حکومت پردھان منتری ڈیجیٹل ہیلتھ مشن ( پی ایم ڈی ایچ ایم) نئی اسکیم شروع کر رہی ہے مرکزی وزیر صحت منسکھ مانڈویہ نے ٹویٹ کرکے اس کی اطلاع دی ہے ۔ اس اسکیم کے تحت ہر ہندوستانی کو ایک یونیک ہیلتھ آئی ڈی ملے گی ، جس سے فرد کے جسم اور صحت سے متعلق ہرمعلومات ڈیجیٹل طور پر دستیاب ہوگی۔ابھی یہ اسکیم پائلٹ پروجیکٹ کے طور پر چندی گڑھ ، انڈومان نکوبار ، دادرنگر حویلی ، لکشدیپ اور لداخ میں چل رہی ہے۔ اس سے پہلے یہ اسکیم نیشنل ڈیجیٹل ہیلتھ مشن کے نام سے چل رہی تھی۔ اسے وزیر اعظم مودی نے 15 اگست 2020 کو شروع کیا تھا ۔سرکاری ذرائع کے مطابق ہیلتھ آئی ڈی کارڈ میں 14 ہندسوں کی یونیک آئی ڈی ملے گی ۔ اس آئی ڈی میں اس شخص کا پورا ہیلتھ ریکارڈ ہوگا اور یہ ریکارڈ سینٹرل سرور سے منسلک ہوگا۔ اس کا مطلب ہے کہ ملک میں کہیں بھی علاج کے لیے جانے پر کارڈ سے ڈاکٹر کو متعلقہ شخص کی صحت کے بارے میں مکمل معلومات مل جائے گی ۔ اس سے ہر بار نیا یا دوبارہ ٹیسٹ کروانے کے لیے پیسے اور وقت کی بچت ہوگی۔پی ایم ڈی ایچ ایم میں متعلقہ افراد کی رضامندی کے بعد ان کا ڈیٹا انکرپشن کے ساتھ سینٹرل نیٹ ورک پرسٹور وہو گا ۔ یہ ڈیٹا بھی ڈاکٹر اس کی اجازت کے بغیر نہیں دیکھ سکتا۔ اس کے لیے پہلے موبائل پر او ٹی پی آئے گا اور اس او ٹی پی کو ڈالنے کے بعد ہی ڈاکٹر اسے دیکھ سکے گا ، لیکن ڈاکٹر اسے ایڈٹ یا کاپی نہیں کر سکتا۔اس سکیم کے آغاز کے بعد کوئی بھی شخص مشن کی ویب سائٹ پر جا کر ہیلتھ آئی ڈی بنا سکتا ہے ۔ اس کے علاوہ سرکاری اور پرائیویٹ اسپتالوں ، کمیونٹی ہیلتھ سینٹروں ، پرائمری ہیلتھ سینٹروں اور کامن سروس سینٹروں پر بھی کارڈ بنائے جا سکیں گے ۔ (یو این آئی)
