سری نگر میں دیواروں اور سڑکوں کو فن مصوری سے خوبصورت بنانے کی مہم

سری نگر، 2 اکتوبر : سمارٹ سٹی مشن کے تحت شہر سری نگر کو جاذب نظر بنانے کے لئے دیواروں اور سڑکوں پر پینٹنگ کی جا رہی ہے جن میں کشمیر کی شاندار ثقافت کو اجاگر کیا جاتا ہے۔شہر کو دیدہ زیب بنانے کا یہ کام اسلامک یونیورسٹی آف سائنس اینڈ ٹیکنالوجی اونتی پورہ اور کشمیر یونیورسٹی کے شعبہ آرکیٹیکچر کے طلبا کر رہے ہیں اور ان کو سری نگر میونسپل کارپوریشن کا بھی اشتراک حاصل ہے۔ایک طالب علم نے یو این آئی اردو کے ساتھ بات کرتے ہوئے کہا کہ سمارٹ سٹی مشن کے تحت ہم دیواروں اور سڑکوں پر پینٹنگ کر رہے ہیں۔انہوں نے کہا کہ ہم کشمیر کی ثقافت سے وابستہ چیزوں جیسے شکارا، بانڈھ پاتھر، کشمیری ڈراموں کے منظر، سماوار، پیپر ماشی وغیرہ کی مصوری کرتے ہیں تاکہ نئی نسل اپنی شاندار ثقافت سے روشناس ہو سکے۔موصوف طالب علم نے کہا کہ ان تصویروں کو دیکھ کر ہمیں اپنی ثقافت یاد رہے گی اور شہر کی خوبصورتی میں بھی چار چاند لگ جائیں گے۔انہوں نے کہا کہ اپنی ثقافت کو زندہ رکھنے اور مزید فروغ دینے کا یہ ایک موثر طریقہ ہے۔ان کا کہنا تھا کہ ہم شہر کے اہم اور خاص مقامات پر یہ مصوری کی جائے گی۔ایک اور طالب علم نے کہا کہ دیواروں پر کی جا رہی اس مصوری جس میں ہم اپنی ثقافت کو اجاگر کر رہے ہیں، سے یہاں آنے والے بیرون وادی کے لوگوں بشمول سیاحوں کو بھی اپنی ثقافت سے واقف کر سکیں گے۔انہوں نے کہا کہ اس طرح ہمارے شہر کے اہم مقامات بھی سیاحتی مقامات کی حیثیت کے حامل بن جائیں گے۔
یو این آئی