سرینگر:؍صدر جمہوریہ رام ناتھ کویند 14اور15اکتوبر کو جموں کشمیر اور لداخ کے دو روزہ دورے پر پہنچ رہے ہیں جبکہ مرکزی وزیر داخلہ 5اگست 2019کو بھارتی آئین میں جموں کشمیر کی خصوصی حیثیت کے حامل دفعہ370اور35Aختم کئے جانے کے بعد پہلی بار 3روزہ دورے پر 23اکتوبر کو سرینگر پہچیں گے۔ایس این ایس کو سرکاری زرائع سے معلوم ہوا ہے صدر ہند رام ناتھ کووند14اور15اکتوبر کو جموں کشمیر اور لداخ کا دوروزہ دورہ کر رہے ہیں۔ذرائع کے مطابق14اکتوبر کو صدر ہند لہیہ پہنچیں گے جہاں وہ سندھو درشن پوجا میں شرکت کریں گے جبکہ اسی شام وہ ادھمپور جائیں گے جہاں وہ فوجی حکام کے ساتھ جموں کشمیر کی تازہ ترین صورتحال کا جائزہ لیں گے۔15اکتوبر کووہ کرگل کا دورہ کرینگے اور دراس میں وار میموریل جاکر ملکی دفاع کے لئے مارے گئے فوجیوں کو خراج عقیدت ادا کرینگے۔صدر جمہوریہ دراس میں فوجی اہلکاروں اور افسروں کے ساتھ بھی ملیں گے۔اس دوران معلوم ہوا ہے کہ مرکزی وزیر داخلہ امیت شاہ 23اکتوبر سے لے کر25اکتوبر تک تین روزہ دورے پرجموں کشمیر پہنچ رہے ہیں جس دوران وہ یونین ٹریٹری خاص کر کشمیر وادی کی سلامتی اور امن و قانون کی صورتحال کا جائزہ لیں گے۔ امیت شاہ کا یہ تین روزہ دورہ جموں کشمیر کی دفعہ370کے تحت خصوصی پوزیشن ختم کئے جانے کے بعد پہلا دورہ ہے اور اس لحاظ سے ان کے دورے کو اہمیت دی جارہی ہے۔ واضح رہے کہ مرکزی سر کار کے جموں کشمیر میں عوامی رابطہ مہم کے تحت اب تک 50سے زائد وزراء نے جموں کشمیر کا دورہ کیا ہے اور وزیر داخلہ کا دورہ بھی عوامی رابطہ مہم کے اسی پروگرام کی ایک کڑی ماناجارہا ہے۔
