سرینگر:نیشنل کانفرنس کے سرپرست اعلیٰ ڈاکٹر فاروق عبدا ﷲنے دفعہ 370کی بحالی کا مطالبہ کرتے ہوئے کہاکہ اس قانون کو دوبارہ بحال کرنے سے ہی جموںوکشمیر میں حالات معمول پر آسکتے ہیں۔ انہوںنے کہاکہ سٹیٹ ہڈ کی بحالی کا فیصلہ بھی جلداز جلد لینے کی ضرورت ہے۔ یو پی آئی کے مطابق پارلیمنٹ کے باہر نامہ نگاروں سے بات چیت کے دوران نیشنل کانفرنس کے سرپرست اعلیٰ ڈاکٹر فاروق عبدا ﷲ نے کہاکہ اگر سرکارجموںوکشمیر میں امن چاہتی ہے توا س کیلئے 370کی بحالی ناگزیر ہے۔ انہوںنے کہاکہ سرکار نے عوامی توقعات کے برعکس فیصلہ لیتے ہوئے اس قانون کو منسوخ کیا ہے۔ فاروق کے مطابق نیشنل کانفرنس آرٹیکل 370کی بحالی کی خاطر ہر سطح پر اپنی آواز بلند کئے گی۔ انہوںنے کہاکہ جموںوکشمیر کے حوالے سے سرکار کی جانب سے کئے جانے والے دعوئے حقیقت کے برعکس ہے۔ فاروق عبدا ﷲ نے حیدر پورہ تصادم کی غیر جانبدارانہ تحقیقات کا مطالبہ کرتے ہوئے کہاکہ اس انکاونٹر میں جاں بحق کئے گئے تیسرے شہری عامر ماگرے کی لاش کو بھی لواحقین کے سپرد کیا جانا چاہئے۔ انہوںنے کہاکہ عامر ماگرے کے لواحقین مسلسل احتجاج پر ہیں لہذا انسانیت کو دھیان میں رکھ کر عامر کی لاش فوری طورپر اُن کے لواحقین کے سپرد کی جانی چاہئے تاکہ اہلِ خانہ آخری مرتبہ اُن کا دیدار کر سکے۔ انہوںنے کہاکہ نیشنل کانفرنس شہری ہلاکتوں میں ملوث افراد کو کیفر کردار تک پہنچانے کی خاطر اپنی آواز بلند کرتی رہے گی۔
