سری نگر:سری نگر کے مضافات میں واقع ہائی سیکورٹی اولڈ ائرپورٹ کے نزدیک واقع رنگریٹھ علاقے میں سوموار کوایک مختصر انکائونٹرمیں2نامعلوم جنگجو مارے گئے۔کچھ مقامی خواتین نے اس واقعے پرواویلاکرتے ہوئے کہاکہ گولیاں چلنے کاواقعہ محض پانچ منٹ تک چلا۔جے کے این ایس کے مطابق جنگجومخالف کارروائیوں کوجاری رکھتے ہوئے پیرکی صبح سیکورٹی فورسزنے شہر سری نگرکے ایک مضافاتی علاقہ رنگریٹھ میں 2مشتبہ جنگجوئوںکوہلاک کردیا۔ پولیس ذرائع نے بتایاکہ کچھ جنگجوئوںکی موجودگی سے متعلق مصدقہ اطلاع ملتے ہی سری نگر پولیس اور سیکورٹی فورسز نے رنگریٹھ علاقے میں ایک مشتبہ جگہ کو گھیرے میں لیا اوریہاں چھپے ہوئے جنگجوؤں کو ہتھیار ڈالنے کو کہا، تاہم، پولیس کے مطابق جنگجوئوںنے خودسپردگی یاسرنڈرکی پیشکش کوٹھکراتے ہوئے نے سیکورٹی فورسز پر فائرنگ شروع کی،جسکے جواب میں فورسزنے بھی کارروائی عمل میں لائی ۔پولیس ذرائع نے مزیدبتایاکہ طرفین کے درمیان ہونے والے تصادم میں2نامعلوم جنگجو مارے گئے۔ انہوں نے کہا کہ ان کی شناخت اور تنظیمی وابستگی کا پتہ لگایا جا رہا ہے۔کشمیر پولیس زون نے آفیشل ٹویٹر پرایک ٹویٹ میں کہاکہ رنگریٹھ میں 2عدم شناخت شدہ جنگجومارے گئے اوریہاں کارروائی جاری ہے جبکہ اسے پہلے ایک ٹویٹ میں کشمیرپولیس زون نے جانکاری فراہم کی تھی کہ سرینگر کے رنگریٹ علاقے میں انکاؤنٹر شروع ہو گیا ہے۔ سری نگر پولیس کام پر ہے۔ مزید تفصیلات آگے آئیں گی۔
