سرینگر:پاکستان بھارت کے خلاف در پردہ جنگ میںمصروف عمل ہے کی بات کرتے ہوئے فوجی سربراہ لیفٹنٹ جنرل ایم ایم نروانے نے کہا کہ پاکستان کی کسی بھی کوشش کو کامیاب نہیںہونے دیا جائے گا۔ انہوں نے کہا کہ ہم کشمیر میں امن چاہتے ہیں اور اس کیلئے کئی پروگراموں پر کام کیا جارہا ہے ۔انہوںنے کہا کہ گذشتہ ایک سال کے دوران وادی کشمیر میں تشدد میں زبردست کمی واقع ہوئی ہے۔ سی این آئی کے مطابق نئی دلی ایک تقریب کے دوران فوجی سربراہ لیفٹنٹ جنرل ایم ایم نروانے نے کہا کہ جموں کشمیر میں سرحدوں پر گزشتہ ایک سال سے امن قائم ہے اور جنگ بندی معاہدے پر عملدر آمد سے کافی مثبت نتائج سامنے آئیں تاہم انہوں نے کہا کہ جنگ بندی سے عسکری کارورائیوں میں کوئی اثر نہیں پڑ ا ہے اور وادی کشمیر میں جنگجو مخالف آپریشن شد و دمد سے جاری ہے۔ انہوںنے کہا کہ پچھلے ایک سال کے دوران وادی میں سلامتی اور استحکام میں نمایاں بہتری آئی ہے جبکہ تشدد کے واقعات میں زبردست کمی واقع ہوئی ہے اور اس سے امن کی سلامتی اور قومی اتحاد کے لئے عوامی حمایت کی عکاسی ہوتی ہے۔انہوں نے کہا کہ جموں و کشمیر اور لداخ یونین علاقہ میں فوج کی ناردرن کمانڈ کی تعیناتی ہمسایہ ممالک کی طرف سے اس بدامنی کو پھیلانے کی کوششوں کے خلاف ڈھال کی حیثیت سے کھڑی ہے اور آئندہ بھی برقرار رہے گی۔ انہوں نے کہا کہ جو بھی ملک بھارت کی خود مختاری اور سالمیت پر نگاہ ڈالے گا فوج نے اسی زبان میں ان کو جواب دے گی انہوںنے کہا کہ جموں ، کشمیر اور لداخ کی بنیادی تعیناتی اور دفاعی تیاریوں میں بھی نمایاں بہتری آئی ہے۔ اس کے لئے ہماری انتھک کوششیں جاری ہیںسلامتی اور فوج کو مستحکم کرنے کے لئے جتنی کوششیں کی گئی ہیں ، اسی عزم کے ساتھ امن و سلامتی کو برقرار رکھنے کی بھی کوششیں کی گئیں۔ انہوں نے کہا کہ بھارت اپنے تمام پڑوسیوں کے ساتھ اگرچہ بہتر تعلقات چاہتا ہے لیکن اس کے بدلے وہ ملک کی سالمیت کے ساتھ کوئی سمجھوتہ کرنے کیلئے تیار نہیں ہے ۔
