سری نگر:30جون سے شروع ہونے والی 43روزہ سالانہ امرناتھ یاتراکے سیکورٹی انتظامات کوپیرکے روز ایک اعلیٰ سطحی سیکورٹی جائزہ میٹنگ میں حتمی شکل دی گئی ۔جے کے این ایس کے مطابق انسپکٹر جنرل آف پولیس کشمیرزون وجئے کمارکی صدارت میں منعقد ہ اس سیکورٹی جائزہ میٹنگ میں جی او سی وکٹر فورس، آئی جی سی آر پی ایف، بی ایس ایف، آئی ٹی بی پی، سی آر پی ایف اور جموں وکشمیرپولیس کے ڈی آئی جیز کے علاوہ جنوبی کشمیر کے ایس ایس پیز اور کمانڈنگ افسروںنے شرکت کی۔آئی جی پی کشمیرکی زیرصدارت میٹنگ میں پولیس اور سیکورٹی فورسز کی طرف سے اٹھائے جانے والے حقیقی خطرات اور انسدادی اقدامات کا جائزہ لیا گیا۔تمام سیکورٹی ایجنسیوںکے اعلیٰ افسران نے امرناتھ یاترا کے پُرامن انعقاد اوریاتریوںکی حفاظت کویقینی بنانے کیلئے اُٹھائے جارہے اقدامات کے بارے میں اپنی اپنی آراء پیش کی۔سیکورٹی حکام نے میٹنگ کے دوران بتایاکہ ممکنہ ملی ٹنٹ حملوں اوردیگرایسی شرپسندانہ سرگرمیوںکوناکام بنانے کیلئے تمام سیکورٹی ایجنسیوںکے مابین مکمل تال میل اوراطلاعات کے فوری تبادلے کومزید فعال بناناہوگا۔انہوںنے کہاکہ ہم امرناتھ یاترا کے پیش نظر سیکورٹی انتظامات میں کسی بھی قسم کی لاپرواہی کے متحمل نہیں ہوسکتے ہیں ۔سیکورٹی حکام نے میٹنگ کے دوران پولیس ،مرکزی پولیس فورسزاور دیگرسیکورٹی دستوںکی تعیناتی کے طریقہ کارکوبھی زیرغور لایا۔میٹنگ میں بتایاگیاکہ یاتریوںکے قافلوںکومکمل تحفظ فراہم کرنے کیلئے سری نگرجموں قومی شاہراہ کے ساتھ ساتھ پہلگام اوربال تال جانے والے راستوں پر بھی سخت سیکورٹی انتظامات کی ضرورت ہے اوراس مقصد کے لئے سبھی ضروری اقدامات اُٹھائے گئے ہیں ۔سیکورٹی جائزہ میٹنگ کی صدارت کرتے ہوئے انسپکٹر جنرل آف پولیس کشمیرزون وجئے کمارنے کہاکہ 30جون سے شروع ہونے والی سالانہ امرناتھ یاترا کیلئے سیکورٹی کے فول پروف انتظامات کئے گئے ہیں اوراسی مقصد کیلئے مرکزی پولیس فورسز کے اضافی دستوںکوکشمیر لاکر یہاں سبھی حساس راستوں اورمقامات پر تعینات کیاگیاہے ۔انہوںنے کہاکہ سیکورٹی فورسزکی تعیناتی کاایک جامع طریقہ کار پہلے ہی وضع کیاگیا ہے ۔