سرینگر، 25اگست 2022/ سب ڈویڑنل مجسٹریٹ (ایس ڈی ایم)، اوڑی شری ہرویندر سنگھ نے آج آزادی کا امرت مہوتسو پر ایک ملٹی میڈیا نمائش کا افتتاح کیا جس کا اہتمام سنٹرل بیورو آف کمیونیکیشن (سی بی سی)، وزارت اطلاعات و نشریات، حکومت ہند نے کیا۔ اس تقریب کا اہتمام سی بی سی کے فیلڈ آفس اننت ناگ نے منی اسٹیڈیم اوڑی، بارہمولہ میں کیا۔ تین روزہ پروگرام کا مقصد سرحدی شہر کے لوگوں میں امرت مہوتسو منانے کے مقاصد اور وژن کے بارے میں بیداری پیدا کرنا ہے۔ مذکورہ ملٹی میڈیا نمائش فوٹو پینلز، فلموں اور تھیم پر مبنی موسیقی کے پروگراموں کی ایک سیریز کے ذریعے ہندوستان کی جدوجہد آزادی کی نمائش کرتی ہے۔اس موقع پر خطاب کرتے ہوئے شری ہرویندر سنگھ، ایس ڈی ایم اوڑی نے ہندوستان کی آزادی کے بعد قبائلی دراندازوں کو پیچھے دھکیل کر قوم کا دفاع کرنے میں اْوڑی کے لوگوں کی بہادری اور عزم کی ستائش کی۔ انہوں نے کہا کہ یہ ہمارے مجاہد آزادی اور مسلح افواج کی قربانیوں کی وجہ سے ہے کہ ہم ایک آزاد ملک میں رہتے ہیں۔ شری سنگھ نے لوگوں سے اپیل کی کہ وہ جدوجہد آزادی کے گمنام ہیروز کے بارے میں جاننے کے لیے نمائش کا دورہ کریں۔جوائنٹ ڈائریکٹر سی بی سی، جناب غلام عباس نے ملٹی میڈیا نمائش کا مختصر جائزہ پیش کرتے ہوئے بتایا کہ امرت مہوتسو مہم کا مقصد قومی یکجہتی کو فروغ دینا اور قومی ترقی کے لیے اجتماعی طور پر کام کرنا ہے۔ جناب عباس نے کہا کہ لوگوں کو حکومت کی طرف سے شروع کی گئی عوامی فلاحی اسکیموں سے فائدہ اٹھانا چاہیے تاکہ وہ قومی ترقی میں اپنا حصہ ڈال سکیں۔دیگر جنہوں نے اجتماع سے خطاب کیا ان میں شری دلجیت سنگھ، سب ڈویژنل ایگریکلچرل آفیسر جنہوں نے پی ایم کسان جیسی کسانوں کے لیے رائج اسکیموں کے نفاذ میں محکمہ زراعت کی کوششوں پر روشنی ڈالی۔ زونل ایجوکیشنل آفیسر، اوڑی جناب چودھری شاہ محمد نے اپنے خطاب میں اوڑی میں تعلیمی شعبے میں ہونے والی پیش رفت کے بارے میں حاضرین کو آگاہ کیا۔شری شاہد محمد لون، فیلڈ پبلسٹی آفیسر، سی بی سی نے بتایا کہ تین روزہ ایونٹ 27 اگست کو اختتام پذیر ہو گا اور اگلے دو دنوں میں طلباء اور عوام کے لیے کوئز، پینٹنگ مقابلے، تقریر، فلم اسکریننگ اور ثقافتی پروگراموں جیسی مختلف سرگرمیاں منعقد کی جائیں گی۔ انہوں نے کہا کہ اسی طرح کا ایک پروگرام سرحدی ضلع پونچھ میں 27 سے 29 اگست 2022 تک منعقد کیا جائے گا۔