سرینگر//چلہ کلان کے سخت ترین تیور کے بیچ جموں ، لداخ اور کشمیر شدید سردی کی لپیٹ میں ہے ۔ جہاں سرینگر میں درجہ حرارت منفی 4.8 ڈگری سینٹی گریڈ ریکارڈ کیا گیا وہیں جموں میں رواں موسم کی سرد رات درج ہوئی ۔ جموں میں اعلیٰ الصبح دھند سے معمول کی زندگی متاثر رہی ۔ ادھر محکمہ موسمیات نے پہلے ہی پیشگوئی کی ہے کہ سال رواں کے آخر تک ابر آلود موسمی صورتحال کے بیچ موسم مجموعی طور پر خشک رہنے کا امکان ہے تاہم 29دسمبر کی شام کو کچھ ایک مقامات پر ہلکی برفباری ہو سکتی ہے ۔ سی این آئی کے مطابق کشمیر ، جموں اور لداخ میں چلہ کلان کی شدید ٹھنڈ جاری ہے ۔ وادی کے تمام اضلاع کے ساتھ ساتھ جموں میں بھی دھند کے بیچ سردی کی لہر میں آئے دن اضافہ ہوتا جا رہا ہے ۔محکمہ موسمیات کے مطابق سرینگر میں گزشتہ رات کے درجہ حرارت منفی 3.5 ڈگری سینٹی گریڈ کے مقابلے میں 1.3 ڈگری سینٹی گریڈ کی کمی ریکارڈ کی گئی۔ انہوں نے کہا کہ پہلگام میں کم سے کم درجہ حرارت منفی 6.7 ڈگری سینٹی گریڈ ریکارڈ کیا گیا جو گزشتہ رات منفی 5.7 ڈگری سینٹی گریڈ تھا۔ انہوں نے کہا کہ گزشتہ 24 گھنٹوں کے دوران 3.7 سینٹی میٹر برفباری ریکارڈ کی گئی،۔ محکمہ موسمیات کے مطابق کوکرناگ میں گزشتہ رات منفی 2.5 ڈگری سینٹی گریڈ کے مقابلے میں کم سے کم 2.9 ڈگری سینٹی گریڈ ریکارڈ کیا گیا۔ عہدیدار نے بتایا کہ گلمرگ میں کم سے کم درجہ حرارت منفی 5.9 ڈگری سینٹی گریڈ ریکارڈ کیا گیا جو گزشتہ رات منفی 5.6 ڈگری سینٹی گریڈ تھا ۔ محکمہ موسمیات کے مطابق کپواڑہ قصبے میں پارہ منفی 4.8 ڈگری سینٹی گریڈ کے مقابلے میں گزشتہ رات شمالی کشمیر کے علاقے میں منفی 3.5 ڈگری سینٹی گریڈ پر رہا۔ اسی طرح سے قاضی گنڈ میں گزشتہ رات منفی 4.2 ڈگری سینٹی گریڈ کے مقابلے میں کم سے کم 3.6 ڈگری سینٹی گریڈ ریکارڈ کیا گیا۔ ادھر محکمہ موسمیات کے مطابق جموں میں گزشتہ رات 4.5 ڈگری سینٹی گریڈ کے مقابلے میں 2.5 ڈگری سینٹی گریڈ ریکارڈ کیا گیا۔ انہوں نے کہا کہ یہ معمول سے 4.9 ڈگری سینٹی گریڈ کم تھا اور جموں و کشمیر کے سرمائی دارالحکومت کے لیے اب تک کی سرد ترین رات ریکارڈ کی گئی ۔ ادھر محکمہ موسمیات نے بتایا کہ لداخ کے لیہہ اور کرگل میں بالترتیب منفی 11.0 ڈگر ی اور 10.0 ڈگری ریکارڈ کیا گیا۔ ادھر محکمہ موسمیات نے 26 سے 30 دسمبر تک عام طور پر ابر آلود موسم کی توقع ہے اور 29 دسمبر کی رات سے لیکر 30دسمبر کی صبح تک شمالی، شمال مغربی اور وسطی کشمیر کے اونچے مقامات وقفے وقفے سے ہلکی برفباری کی توقع ہے۔ ۔اسی طرح لداخ خطے کے دراس میں بھی درجہ حرارت بہت ہی حد تک نیچے آگیا ہے ۔ شدید سردی کی وجہ سے شہر سرینگر اور دیگر علاقوں میں آبی ذخائر منجمد ہونے کی اطلاعات موصول ہوئی ہیں۔
