سرینگر//وزیر دفاع راجناتھ سنگھ نے کہا ہے کہ مرکزی سرکار جموں کشمیر میں انتخابات کرانے کے لئے باالکل تیار ہے تاہم اس کا حتمی فیصلہ الیکشن کمیشن آف انڈیا کو کرنا ہے ۔ وزیر دفاع نے کہا ہے کہ مرکزی سرکار خطے میں تعمیر و ترقی اور امن و سلامتی کیلئے کام کررہی ہے ۔سی این آئی کے مطابق وزیردفاع راجناتھ سنگھ نے جموں و کشمیر میں اسمبلی انتخابات کے حوالے سے پوچھے گئے ایک سوال کے جواب میں کہا کہ مرکزی سرکار جموں و کشمیر میں انتخابات کرانے کیلئے بالکل تیار ہیں تاہم حتمی فیصلہ الیکشن کمیشن آف انڈیا کو ہی لینا ہوگا۔ انہوںنے کہا کہ یوٹی میں تعمیر و ترقی اور امن وسلامتی کیلئے مرکزی سرکار کام کررہی ہے اور گزشتہ تین برسوں کے دوران کافی ڈیولپمنٹ ہوئی ہے جبکہ حالات بھی معمول پر آچکے ہیں ۔ راجناتھ سنگھ نے کہا کہ اگر میں یہ کہوں کہ جموں کشمیر کے حالات ملک کی کئی ریاستوں سے کافی بہتر ہے تو اس میں کوئی حرج نہیں۔ انہوں نے کہا کہ مرکزی سرکار نے آئین کے تحت کام کیا ہے اس میں کوئی بھی اپنی من مرضی نہیں کی گئی ہے ۔ انہوںنے کہا کہ بھارتیہ جنتا پارٹی کے بارے پھیلائے گئے پروپگنڈا جھوٹ کے سوا کچھ بھی نہیں ہے انہوںنے کہا کہ بھارتیہ جنتا پارٹی نے ہمیشہ سے ہی ملک کی سلامتی کو مقدم رکھا ہے اور یہ پارٹی جموں کشمیر کے لوگوں کے حق میں کام کرتی رہے گی۔ انہوں نے کہا کہ چین اور پاکستان کی تمام تدابیر ناکام ہوچکی ہیںاور لداخ ہو یا جموں کشمیردشمنوں کو منہ کی کھانی پڑی ہے ۔ نئی دلی میں منعقدہ ایک تقریب میںوزیر دفاع نے کہا کہ اروناچل پردیشن میں جس بہادری کے ساتھ چینی فوج کو بگانے پر مجبور کیا ہمیں ان فوجیوں پر فخر ہے اور یہ بات چین کو ہمیشہ یاد رہنی چاہئے ۔ انہوںنے کہا کہ مرکزی سرکار کوئی بھی غیر جمہوری اقدام نہیں اُٹھائے گی بلکہ جموں کشمیر لداخ اور دیگر خطوں کی یکساں ترقی میں کوئی فرق نہیں کیا جائے گا۔
