جموں؍۲؍مارچ؍ سیکرٹری منصوبہ بندی ، ترقی اور نگرانی محکمہ ڈاکٹر راگھو لنگر نے آج مرکزی معاونت والی سکیموں کے تحت اِخراجات، یوٹی کیپکس کے تحت طبعی اور مالی پیش رفت ، مکمل شدہ کاموں کی فزیکل تصدیق اوریوٹی پی ایم جی پورٹل کی نگرانی کے لئے شناخت کئے گئے پروجیکٹوں کا جائزہ لینے کے لئے ایک میٹنگ کی صدارت کی ۔
میٹنگ میں تمام اِنتظامی محکموں کے پلاننگ اَفسران نے شرکت کی۔ سیکرٹری پلاننگ نے تمام متعلقہ اَفسران کو ہدایت دی کہ وہ مالی برس 2022-23ء کے اِختتام قریب آنے کے پیش نظر روزنہ محکمانہ جائزہ لیں او راس بات کو یقینی بنائیں کہ جاری کردہ بجٹ 31 ؍ مارچ سے قبل مکمل طو رپر استعمال ہو جائے۔
میٹنگ کا آغاز مرکزی طورپر سپانسر شدہ اور مرکزی سیکٹر سکیموں کے تحت فنڈ کی دستیابی اور اَخراجات کی پوزیشن کے جائزہ کے ساتھ ہوا۔مختلف مرکزی معاونت والی سکیموں کو عملانے کے لئے جموںوکشمیر یوٹی میں سنگل نوڈل اکائونٹ ( ایس این اے ) کو فعال کیا گیا ہے ۔ میٹنگ میں یہ بتایا گیا کہ مرکزی معاونت والی سکیموں کے تحت فنڈزکے آف ٹیک میں گزشتہ برس کے مقابلے میں تقریباً 900 کروڑ روپے کا اِضافہ ہوا ہے جو جنوری میں ختم ہونے والی مدت میں 9,423 کروڑ روپے سے بڑھ کر 10,303 کروڑ روپے ہو گیا ہے۔
اخراجات بھی 5,224کروڑ روپے سے بڑھ کر 6,222 کروڑ روپے ہو گئے ہیں ۔ گزشتہ مالی برس کی اسی مدت کے مقابلے میں 31؍ جنوری 2023ء تک 9فیصد کا اِضافہ ہوا ۔ فروری ماہ کے ایم پی آر اس مہینے کی 5تاریخ تک موصول ہونے پر خاطر خواہ پیش رفت کی مزید اِطلاع ملے گی۔جنوری 2023تک یوٹی سیکٹر کے تحت 2867.86 کروڑ روپے، مذاکراتی قرضوں کے تحت 288.81 کروڑ روپے اور پی ایم ڈی پی کے تحت تقریباً 1100 کروڑ روپے اِستعمال کئے گئے ہیں۔
یوٹی کیپکس بجٹ کے تحت جاری برس کے دوران اَب تک 10,920 کام/پروجیکٹ مکمل ہوچکے ہیں ۔ جوان منصوبوں کے علاوہ ہے جو ڈسٹرکٹ کیپکس کے تحت مکمل کئے گئے ہیں ۔ محکموں نے میٹنگ میں یقین دِلایا کہ چیف سیکرٹری کے دفتر کی طرف سے پہلے ہی دی گئی ہدایات کے مطابق یوٹی کیپکس کے تحت 22,000 پلس کاموں کاہدف حاصل کیا جائے گا۔
