گاندربل؍مرکزی وزیر ماہی پروری اور پشوو ڈیری پالن پرشوتم روپالا نے آج گاندربل کے فروزن سیمن پروجیکٹ رنبیر باغ کا دورہ کیا اور اُنہوں نے وہاں راشٹریہ گو کل مشن کے تحت 21.63 کروڑ روپے کی لاگت سے منظور شدہ فروزن سیمن سٹیشن کا سنگ بنیاد رکھا۔
اِس موقعہ پر مرکزی وزیر کو پروجیکٹ کی مالی ترتیب اور فروزن سیمن سٹیشن میں دستیاب سہولیات کے بارے میںجانکاری دی گئی جس میںسٹرلائز یشن روم ، اے وِی سٹرلائزیشن روم ، کیوسی کی مائیکروبائل لیبارٹری ، فریز نگ روم ، کوالٹی کنٹرول لیبارٹری اور دیگر ضروری سہولیات شامل ہیں۔
مرکزی وزیر نے سیمن سینٹر کے مختلف حصوں کا دورہ کیا اور بیل شیڈوں کا معائینہ کیا ۔اُنہیں جانکاری دی گئی کہ موجودہ سیمن سٹیشن جموںوکشمیر اور لداخ کے دونوں یوٹیز میں تقریباً 800 سرکاری مصنوعی تخم ریزی مراکز اور تقریباً400 پرائیویٹ اے آئی کارکنوں کی مانگ کو پورا کرنے کے لئے ہر برس فروزن سیمن سٹراس( ایف ایس ایس) کی تقریباً 7لاکھ ڈوزز تیار کر رہا ہے ۔
مرکزی وزیر کوبیل شیڈوں کا معائینہ کرتے ہوئے جانکاری دی گئی کہ فی الحال ہائی جنرک میرٹ بریڈنگ بیلوں کو بریڈنگ بُل فارم یعنی ہولسٹین فریزئین ، جرسی اور ریڈ سندھی میں رکھا گیا ہے ۔
دریں اَثنأ ، مرکزی وزیر نے سٹاف اور کیجول لیبروں سے بھی بات چیت کی۔سٹاف اور کیجول لیبروں نے مرکزی وزیر موصوف کواَپنے درپیش مختلف مسائل گوش گزار کئے ۔مرکزی وزیر نے یقین دِلایا کہ ان کے تمام جائز مطالبات کو ترجیحی بنیادوں پر پورا کیا جائے گا۔
مرکزی وزیر موصوف نے اِس موقعہ پر اَپنے خیالات کا اِظہار کرتے ہوئے کہا کہ وزارتِ پشوپالن ،ماہی پروری اور دودھ پالن فروزن سیمن سٹراس( ایف ایس ایس) کی بڑھتی ہوئی مانگ کو پورا کرنے کے لئے فروزن سیمن پروجیکٹ رنبیر باغ کی پیداوار کو بڑھانے کے لئے پُر عزم ہے ۔اِس سلسلے میں مرکزی حکومت نے 21.63 کروڑ روپے کے پروجیکٹ کو منظوری دی ہے جس میں 6کروڑ روپے جاری کئے گئے ہیں۔اُنہوں نے مزید کہا کہ اِس منصوبے کی تکمیل کے بعد یہ نہ صرف مقامی طلب کو پورا کرے گا بلکہ فروزن سیمن سٹراس( ایف ایس ایس) کو بھی برآمد کرے گا۔اُنہوں نے کہا کہ پروجیکٹ کی تکمیل سے نسل کی بہتری سے دودھ کی پیداوار میں اِضافہ ہوگا اور پشو پالن کمیونٹی کی آمدنی میں اِضافہ ہوگا۔
