سرینگر 05 دسمبر//سری نگر لہیہ شاہراہ پر زوجیلا کے مقام پر گاڑی گہری کھائی میں جاگری جس کے نتیجے میں چار سیاح برسر موقع ہی جاں بحق ہوئے جبکہ دو دیگرزخمی ہوئے۔ یو پی آئی کے مطابق منگل کے روز سری نگر لہیہ شاہراہ پر زوجیلا پاس کے مقام پر اس وقت سنسنی کا ماحول پھیل گیا جب سیاحوں کی ایک گاڑی ڈرائیور کے قابو سے باہر ہوکر گہری کھائی میں جاگری جس کے نتیجے میں گاڑی میں سوار چھ سیاح شدید طورپر زخمی ہوئے۔ معلوم ہوا ہے کہ حادثے کی اطلاع ملتے ہی پولیس ، فوج اور مقامی لوگ جائے موقع پرپہنچے اور زخمیوں کو طبی امداد کی خاطر نزدیکی ہسپتال منتقل کیا تاہم وہاں پر تعینات ڈاکٹروں نے چار سیاحوںکو مردہ قرار دیا جبکہ دو کی حالت بھی تشویشناک بنی ہوئی ہے۔ ذرائع نے بتایا کہ زخمیوں کو مزید علاج ومعالجہ کی خاطر صورہ میڈیکل انسٹی چیوٹ منتقل کیا گیا۔مہلوکین کیرلہ کے رہنے والے بتائے جارہے ہیں۔ دریں اثنا پولیس نے اس ضمن میں کیس درج کرکے مزید تحقیقات شروع کی ہے۔
