سمارٹ سٹی پروجیکٹوں پر کام زوروشور کیساتھ جاری: ڈاکٹر اُویس

سرینگر//سری نگر سمارٹ سٹی لمیٹڈ کے چیف ایگزیکٹو آفیسر (سی ای او) ڈاکٹر اویس احمد نے بدھ کو اس بات کا اعادہ کیا کہ وہ پورے زور و شور سے کام جاری رکھیں گے اور تمام جاری پروجیکٹوں کو مقررہ مدت میں مکمل کریں گے۔کشمیر نیوز سروس ( کے این ایس ) کے مطابق ڈاکٹر اویس نے کہا کہ حکام سری نگر سمارٹ سٹی لمیٹڈ کی طرف سے شروع کئے گئے ترقیاتی منصوبوں کی رفتار اور پیش رفت کا باقاعدگی سے جائزہ لے رہے ہیں۔انہوں نے یہ بھی کہا کہ شہر کے پرتاپ پارک میں آنے والا بلیدان استمبھ مقررہ مدت میں مکمل کر لیا جائے گا۔ڈاکٹر اویس نے کہا، "بلیدان ستمب پر کام کی رفتار زوروں پر چل رہی ہے اور اسے مقررہ مدت میں مکمل کر لیا جائے گا۔”اعداد و شمار فراہم کرتے ہوئے، انہوں نے کہا کہ پہلے مرحلے کے دوران 90منصوبے مکمل کیے گئے جبکہ اب تک کل 95منصوبے مکمل ہو چکے ہیں۔ انہوں نے مزید کہا کہ ہم نے شہر کی خوبصورتی کے لیے مزید 58 منصوبے شروع کیے ہیں۔ایس ایس سی ایل کے عہدیداروں کی کوششوں کو سراہتے ہوئے، انہوں نے کہا، "گزشتہ چند سالوں میں سری نگر شہر میں جو کچھ بھی سامنے آیا ہے، اس کا سہرا سری نگر سمارٹ سٹی لمیٹڈ کی ٹیم کو جاتا ہے جس نے شہر کو دوبارہ ڈیزائن کرنے کے لیے سخت محنت کی”۔اپنے پیشرووں کے کردار کا اعتراف کرتے ہوئے انہوں نے کہا کہ ایک قابل ستائش کام کیا گیا ہے اور وہ کام کی رفتار کو برقرار رکھنے کی پوری کوشش کریں گے۔